Kolonel Nevzad Asllani i bashkohet politikës pas një karriere të gjatë në shërbim të Kosovës
Kolonel Nevzad Asllani u lind më 20 prill 1971 në fshatin Lajçiq të Komunës së Kamenicës. Arsimin fillor e kreu në vendlindje, ndërsa shkollimin e mesëm në Gjilan. Studimet universitare i nisi në Fakultetin e Shkencave Matematiko-Natyrore në Prishtinë, por ato iu ndërprenë për shkak të shërbimit të detyrueshëm ushtarak në ish-Armatën Jugosllave. Pas luftës, ai i përfundoi studimet universitare në fushën e Menaxhimit të Emergjencave Civile.
Angazhimi i tij kombëtar dhe politik nisi herët, qysh si nxënës i shkollës së mesme, kur mori pjesë aktive në demonstratat gjithëpopullore të viteve 1988 dhe 1989. Në vitin 1991 iu bashkua Partisë së Unitetit Kombëtar (UNIKOMB), subjekt politik i udhëhequr fillimisht nga Halil Alidema e më pas nga Ukshin Hoti. Më 31 korrik 1994, nën masa të shtuara policore, shtëpia e tij u rrethua dhe ai u arrestua së bashku me babanë e tij, nën akuzën për organizim të armatosur, në kuadër të rezistencës aktive të asaj kohe.
Së bashku me dy vëllezërit e tij, Nevzad Asllani iu bashkua radhëve të Ushtrisë Çlirimtare të Kosovës, ku mori pjesë aktive në luftë deri në çlirimin e vendit. Pas luftës, ai kontribuoi në proceset e rëndësishme të tranzicionit, duke u angazhuar në demilitarizimin dhe transformimin e UÇK-së. Në këtë periudhë shërbeu edhe si koordinator me Organizatën Ndërkombëtare për Migrim (IOM), duke qenë përgjegjës për zbatimin e projekteve humanitare në ndihmë të komunitetit.
Karrierën ushtarake e vazhdoi në Trupat Mbrojtëse të Kosovës (TMK), ku u emërua shef i Qendrës Operative në Zonën e Gjashtë të Mbrojtjes me gradën major. Për profesionalizmin dhe përkushtimin e tij u vlerësua me dhjetëra mirënjohje dhe lëvdata nga TMK-ja dhe partnerët ndërkombëtarë, përfshirë edhe KFOR-in amerikan në Bondsteel.
Me themelimin e Forcës së Sigurisë së Kosovës, gjatë viteve 2009–2026, Kolonel Asllani ushtroi detyra të rëndësishme në nivele taktike, operacionale dhe strategjike. Ai ka përfunduar dy kolegje pasuniversitare në fushën e mbrojtjes dhe sigurisë në Akademinë e Forcave të Armatosura të Republikës së Shqipërisë, si dhe ka ndjekur dhjetëra trajnime profesionale brenda dhe jashtë vendit.
Më 20 prill të këtij viti, Kolonel Nevzad Asllani e përmbylli me sukses karrierën aktive në Forcën e Sigurisë së Kosovës. Sot, ai i bashkohet Lëvizjes Vetëvendosje dhe synon që përvojën e tij ushtarake, institucionale dhe kombëtare ta vërë në shërbim të qytetarëve dhe institucioneve të Republikës së Kosovës.
