Ka filluar vizita studimore njëjavore e mësuesve zviceranë nga PH Zug në UKZ
Në kuadër të bashkëpunimit të suksesshëm ndërmjet Universitetit Publik “Kadri Zeka” (UKZ) dhe Shkollës së Lartë Pedagogjike (PH) Zug nga Zvicra, sot nizi vizita studimore njëjavore e mësuesve zviceranë, që realizohet në kuadër të projektit të mbështetur nga Movetia, i cili synon shkëmbimin profesional dhe ndërkulturor midis mësuesve nga Kosova dhe Zvicra. Vizita do të zgjasë nga 3 deri më 7 nëntor 2025.
Pritja e mysafirëve u bë nga Rektori i UKZ-së, Prof. Asoc. Dr. Artan Dermaku dhe bashkëpunëtorët e tij, duke theksuan rëndësinë e bashkëpunimit ndërkombëtar në arsim.
Në fjalën e tij, Rektori Dermaku tha se jemi shumë të kënaqur që mirëpresim kolegët tanë nga Zvicra. Kjo vizitë njëjavore, e realizuar në kuadër të Movetia, është një mundësi e shkëlqyer për të forcuar bashkëpunimin akademik dhe për të shkëmbyer përvoja të vlefshme pedagogjike. Shpresoj që ky projekt të nxisë ide të reja për mësimdhënie dhe të forcojë partneritetin tonë afatgjatë, tha Rektori Dërmaku.
Kurse Prorektori për Bashkëpunim Ndërkombëtar dhe Projekte Dukagjin Leka tha se dialogu dhe bashkëpunimi ndërkulturor janë thelbësorë për zhvillimin e arsimit. Vizita e mësuesve zviceranë në UKZ do të ofrojë mundësi të shkëlqyera për të mësuar nga njëri-tjetri, për të vëzhguar praktika të ndryshme mësimore dhe për të ndërtuar rrjete profesionale që do të shërbejnë në të ardhmen, ka thënë Prorektori Leka.
Ndërsa Dekani i Fakultetit të Edukimit, Prof. Dr. Merxhan Avdyli, theksoi se bashkëpunimi kolegjial është një metodë e rëndësishme për zhvillimin profesional të mësuesve. Pjesëmarrësit do të kenë mundësinë të ndajnë përvoja dhe të praktikojnë mësimdhënie bashkëkohore në klasë, duke mësuar jo vetëm nga kolegët zviceranë, por edhe duke reflektuar mbi metodat e tyre të punës, tha ndër tjerash Dekani Avdyli.
Udhëheqësja e grupit nga Zvicra, mësimdhënësja Shpresa Jashari, falënderoi Universitetin “Kadri Zeka” për mikpritjen dhe bashkëpunimin e ngrohtë, duke theksuar se kjo vizitë njëjavore është një mundësi unike për shkëmbim profesional e ndërkulturor, për të mësuar nga njëri-tjetri dhe për të ndërtuar ura të qëndrueshme bashkëpunimi midis institucioneve arsimore të Kosovës dhe Zvicrës.
Programi i vizitës përfshin vizita në shkolla të ndryshme në Gjilan, ku do të ketë hospitime kolegjiale nga mysafirët zviceran që i mirëpresin mësuesit kosovarë në klasë, duke përfshirë orët e mësimit dhe diskutime reflektuese pas tyre, do të ketë prezantime të praktikave më të mira, punëtori dhe aktivitete kulturore. Pjesëmarrësit do të kenë takime edhe me stafin akademik të UKZ-së.
Ky projekt në kuadër të Movetia nuk është vetëm një mundësi për shkëmbim pedagogjik, por edhe një hap i rëndësishëm drejt forcimit të marrëdhënieve ndërkombëtare, zhvillimit profesional të mësuesve dhe promovimit të bashkëpunimit mes institucioneve arsimore të Kosovës dhe Zvicrës.
Kjo vizitë u organizua me qëllim shkëmbimin e përvojave akademike, njohjen me sistemin arsimor të Kosovës dhe forcimin e bashkëpunimeve ndërkombëtare ndërmjet institucioneve arsimore.
