Gjilani mban dëgjimin publik për Kornizën Afatmesme Buxhetore 2027–2029, prezantohen prioritetet zhvillimore
Komuna e Gjilanit ka mbajtur dëgjimin publik në kuadër të hartimit të Kornizës Afatmesme Buxhetore (KAB) për periudhën 2027–2029, ku qytetarët patën mundësinë të njihen me prioritetet buxhetore dhe të paraqesin kërkesat e tyre për projektet që i konsiderojnë të nevojshme.
Në këtë takim morën pjesë drejtoresha për Shëndetësi dhe Mirëqenie Sociale, Mimoza Kadriu Qerimi, drejtori për Administratë, Elbasan Shabani, drejtori për Zhvillim Ekonomik, Haki Huruglica, anëtarë të Kuvendit Komunal, përfaqësues të organizatave të shoqërisë civile, komunitetit të biznesit, mediave dhe qytetarë.
Dokumentin strategjik financiar e prezantoi drejtori për Buxhet dhe Financa, Avdyl Kastrati, i cili tha se Korniza Afatmesme Buxhetore është dokumenti më i rëndësishëm strategjik financiar që përcakton orientimin e zhvillimit ekonomik, social dhe infrastrukturor të Komunës së Gjilanit për tre vitet e ardhshme.
Sipas tij, KAB nuk është vetëm një dokument financiar, por paraqet vizionin e komunës për zhvillim të qëndrueshëm, menaxhim të përgjegjshëm të financave publike dhe ofrim të shërbimeve cilësore për qytetarët.
Kastrati theksoi se përmes këtij dokumenti synohet krijimi i një lidhjeje të drejtpërdrejtë ndërmjet nevojave të qytetarëve, prioriteteve strategjike komunale dhe mundësive reale financiare, duke siguruar që çdo euro e buxhetit të shfrytëzohet në mënyrë sa më efikase dhe me ndikim sa më të madh në jetën e qytetarëve.
“Gjatë periudhës 2027–2029, Komuna e Gjilanit do të vazhdojë të investojë në projekte që ndikojnë drejtpërdrejt në mirëqenien e qytetarëve, përmirësimin e infrastrukturës publike, avancimin e arsimit dhe shëndetësisë, mbrojtjen e mjedisit, zhvillimin ekonomik lokal dhe transformimin digjital të administratës komunale”, deklaroi ai.
Drejtori për Buxhet dhe Financa bëri të ditur se dokumenti është hartuar në përputhje me legjislacionin në fuqi, qarkoret buxhetore të Ministrisë së Financave, Punës dhe Transfereve, si dhe me prioritetet zhvillimore të Komunës së Gjilanit.
Ai shtoi se qëllimet kryesore të Kornizës Afatmesme Buxhetore 2027–2029 janë planifikimi i qëndrueshëm financiar, përcaktimi i prioriteteve zhvillimore, menaxhimi i përgjegjshëm i financave publike, rritja e transparencës dhe llogaridhënies, përfshirja aktive e qytetarëve në planifikimin buxhetor, harmonizimi i prioriteteve me kapacitetet financiare dhe përmirësimi i shërbimeve publike.
Kastrati prezantoi edhe të dhënat kryesore të Komunës së Gjilanit, duke theksuar se ajo vazhdon të jetë një nga komunat më të rëndësishme në Kosovë me potencial të madh ekonomik, demografik dhe zhvillimor. Sipas tij, komuna ka 82.980 banorë, 19.871 ekonomi familjare, 6.933 biznese aktive, 42 fshatra dhe 15.199 nxënës në arsimin parauniversitar.
“Këta tregues dëshmojnë për nevojën e vazhdueshme të investimeve në infrastrukturë, arsim, shëndetësi, mjedis dhe zhvillim ekonomik lokal”, tha drejtori.
Gjatë prezantimit u theksuan edhe prioritetet strategjike për periudhën 2027–2029, të cilat përfshijnë zhvillimin ekonomik lokal përmes mbështetjes së bizneseve dhe krijimit të kushteve për investime të reja, përmirësimin e arsimit me investime në infrastrukturë, pajisje dhe teknologji, modernizimin e shëndetësisë dhe mbështetjen e kategorive sociale, investimet në infrastrukturë rrugore, rrjetet e ujësjellësit dhe kanalizimit, mbrojtjen e mjedisit, si dhe avancimin e qeverisjes digjitale përmes shërbimeve elektronike, ndriçimit inteligjent, kamerave të mençura dhe sistemeve inteligjente të menaxhimit të parkingjeve.
Sa i përket planifikimit buxhetor, u bë e ditur se buxheti i vitit 2026 është 41.928.924 euro, për vitin 2027 parashihet të arrijë në 43.586.882 euro, në vitin 2028 në 44.949.608 euro, ndërsa për vitin 2029 është planifikuar në 47.311.757 euro.
Sipas Kastratit, kjo paraqet një rritje prej 5.38 milionë eurosh, ose 12.84 për qind, krahasuar me vitin 2026, duke krijuar mundësi për financimin e projekteve të reja zhvillimore dhe përmirësimin e shërbimeve komunale.
Në fund të dëgjimit publik, qytetarët paraqitën kërkesat dhe propozimet e tyre për realizimin e projekteve në lagjet dhe vendbanimet ku jetojnë, me synim përmirësimin e kushteve të jetesës.
