FIFA mund ta përjashtojë një kombëtare nga Botërori, ‘mësohet’ zëvendësuesi potencial
Nigeria mund të sigurojë ende kualifikimin për Botërorin e 2026-ës, teksa pret një vendim kyç nga FIFA që mund ta zëvendësojë një rival direkt.
Në vetëm katër muaj, Kupa e Botës do të nisë në Amerikën e Veriut, me nikoqirë Shtetet e Bashkuara të Amerikës, Meksikë dhe Kanada.
Për herë të parë, 48 ekipe do të marrin pjesë në turne, nga 32 sa ishin deri në vitin 2022.
Megjithatë, disa kombëtare të mëdha rrezikojnë të mbeten jashtë. Mes tyre aktualisht është Nigeria, por situata mund të ndryshojë nëse FIFA vendos të përjashtojë një ekip tjetër.
Në nëntor, DR Congo mposhti “Super Eagles” për të siguruar një vend në një ndeshje ndërkontinentale kualifikuese për finalet, e planifikuar më 31 mars kundër Kaledonisë së Re ose Xhamajkës.
Pas ndeshjes, Federata e Futbollit e Nigerisë (NFF) paraqiti një ankesë në FIFA në dhjetor, duke pretenduar se DR Congo kishte aktivizuar lojtarë të palejueshëm.
Sipas pretendimit, Aaron Wan-Bissaka dhe Axel Tuanzebe – ish-lojtarë të moshave të Anglisë – nuk duhet të kishin luajtur, pasi ligji kongolez nuk lejon shtetësi të dyfishtë.
FIFA konfirmoi se çështja është në shqyrtim, por nuk dha një afat për vendimin.
Drejtori i komunikimit i NFF, Demola Olajire, deklaroi se çdo pretendim për një vendim të marrë është i pavërtetë. “FIFA nuk na ka komunikuar asnjë vendim, as neve dhe as federatës kongoleze,” tha ai.
Wan-Bissaka dhe Tuanzebe më pas luajtën për DR Congo në Kupën e Kombeve të Afrikës në Marok.
Sekretari i përgjithshëm i NFF, Mohammed Sanusi, shtoi: “Rregulli kongolez thotë se nuk mund të kesh shtetësi të dyfishtë, por disa nga lojtarët e tyre kanë pasaporta evropiane dhe franceze. Pretendimi ynë është se FIFA është mashtruar duke i lejuar ata.”
Federata e Futbollit e Kongos e ka hedhur poshtë ankesën, duke e quajtur një përpjekje për të “fituar nga dera e pasme”.
Nëse FIFA e shpall DR Congo fajtore, ende nuk është e qartë se çfarë mase do të merret.
Dënimet mund të përfshijnë gjoba ose paralajmërime, por në skenarin më serioz, FIFA mund të urdhërojë humbje në tavolinë ose t’ia japë fitoren Nigerisë – çka do të hapte derën për kualifikimin e tyre në Kupën e Botës 2026.
