Delegacioni nga Gjilani dhe Kamenica takohet me biznesmenët shqiptarë në Bursa, ftesë për investime…
Një delegacion nga Komuna e Gjilanit dhe ajo e Kamenicës ka zhvilluar vizitë zyrtare në Bursa të Turqisë, ku u takua me krerët e dy shoqatave të fuqishme të biznesit shqiptar, ARNİAD dhe RUMELİSİAD.
Në delegacion ishin drejtori i Zhvillimit Ekonomik të Gjilanit, Haki Huruglica, drejtori i Zhvillimit Ekonomik të Kamenicës, Edon Dermaku, dhe zëdhënësi i Komunës së Gjilanit, Eronit Hajdari. Në takim ishte i pranishëm edhe veprimtari i njohur Recep Gündüz.
Gjatë vizitës, delegacioni u prit nga kryetari i ARNİAD, Bayram Taşocak, dhe anëtarët e shoqatës, si dhe nga kryesia e RUMELİSİAD, shoqatë që numëron mbi 300 kompani të anëtarësuara kryesisht në sektorin e prodhimit.
Para biznesmenëve u prezantuan mundësitë konkrete që ofrojnë Gjilani dhe Kamenica për investitorët potencialë. Komunat shprehën gatishmërinë për t’i mbështetur investitorët, brenda mundësive ligjore, me qëllim të konkretizimit të bashkëpunimit ekonomik.
Delegacioni i ftoi biznesmenët që t’i vizitojnë dy qytetet për të parë nga afër potencialin investues.
Siç bëhet e ditur nga postimet e aktivistit Albert Selishta, i cili ka studiuar më herët në Turqi dhe njeh mirë realitetin atje, kjo vizitë synon të hapë ura të reja ekonomike mes Luginës, Kosovës dhe diasporës së fuqishme shqiptare në Turqi.
