Arta Haziri përfaqëson Kosovën në jurinë profesionale të Festivalit Ndërkombëtar “Ezerski Biseri 2026” në Strugë
STRUGË – Arta Haziri, drejtoreshë e Festivalit Ndërkombëtar për Fëmijë “Mollëkuqet” në Gjilan, ka përfaqësuar Republikën e Kosovës si anëtare e Panelit Profesional të Jurisë në Festivalin Ndërkombëtar “Ezerski Biseri 2026”, që u mbajt në Strugë.
Pjesëmarrja e Hazirit në jurinë profesionale e ka vendosur Kosovën në një tryezë ndërkombëtare të vlerësimit artistik, ku ishin të përfaqësuara profesioniste të muzikës dhe artit nga Izraeli, Qiproja, Polonia, Estonia, Bullgaria, Maqedonia e Veriut dhe Shqipëria.
Për Hazirin, kjo ishte një mundësi e veçantë për shkëmbim profesional dhe kulturor, por edhe një dëshmi se arti dhe muzika mund të krijojnë ura mes vendeve dhe kulturave.
“Arti dhe muzika nuk njohin kufij, por krijojnë ura të fuqishme mes kulturave, vendeve dhe njerëzve”, ka theksuar Haziri, duke e vlerësuar si të veçantë përvojën e saj në këtë festival ndërkombëtar.
Në edicionin e sivjetmë të “Ezerski Biseri”, Kosovën e përfaqësoi edhe konkurrentja Tiara Hajdari, e cila arriti të fitojë vendin e dytë në kategorinë e saj.
Haziri e ka përgëzuar Hajdarin për këtë rezultat, duke i uruar suksese të mëtejshme në rrugëtimin e saj artistik.
Në vlerësimin e saj për festivalin, Haziri ka veçuar transparencën, korrektësinë dhe profesionalizmin gjatë procesit të vlerësimit të jurisë, duke e cilësuar atmosferën e krijuar si të denjë, të drejtë dhe të barabartë për të gjithë pjesëmarrësit.
Ajo ka falënderuar organizatorët për ftesën dhe besimin, ndërsa një përgëzim të veçantë ia ka adresuar drejtorit të festivalit, Marianit, për organizimin dhe profesionalizmin e treguar.
Pjesëmarrja e Arta Hazirit në jurinë profesionale të “Ezerski Biseri 2026” vjen edhe si një tjetër dëshmi e angazhimit të saj në jetën kulturore dhe muzikore përtej Kosovës, duke e lidhur përvojën e Festivalit “Mollëkuqet” me skenën ndërkombëtare të festivaleve për fëmijë dhe të rinj.
Nga Struga, mes muzikës, talenteve të reja dhe përfaqësimit ndërkombëtar, Kosova u kthye edhe me një çmim – vendin e dytë të Tiara Hajdarit.
