Agim Keka në krye të Federatës së Bejzbollit dhe Softbollit – një emër me autoritet, disiplinë dhe vizion në sportin kosovar
Një figurë e respektuar në sport dhe shoqëri, i njohur për disiplinën, karakterin dhe autoritetin e tij, Agim Keka ka marrë drejtimin e Federatës së Bejzbollit dhe Softbollit të Kosovës, duke nisur një kapitull të ri për zhvillimin dhe konsolidimin e këtij sporti në vend.
Pas zgjedhjes së tij në Kuvendin Zgjedhor të federatës, Keka është pritur në takim nga drejtuesit e Komiteti Olimpik i Kosovës, presidenti Ismet Krasniqi dhe sekretari i përgjithshëm Besim Aliti.
Gjatë takimit është diskutuar për gjendjen aktuale dhe të ardhmen e bejzbollit dhe softbollit në Kosovë, me fokus në aktivizimin e klubeve, shtimin e aktiviteteve sportive dhe përfshirjen e të rinjve në këtë sport. Po ashtu, vëmendje e veçantë i është kushtuar edhe procesit të licencimit të federatës, si një hap i rëndësishëm drejt funksionalizimit dhe zhvillimit të saj institucional.
Presidenti Krasniqi e ka përgëzuar Kekën për detyrën e re, duke theksuar se KOK-u do të jetë mbështetje për federatën në rrugën drejt zhvillimit dhe masovizimit të sportit në Kosovë.
Nga ana tjetër, Keka ka shprehur përkushtimin e tij për të ndërtuar një federatë funksionale dhe për të krijuar kushte më të mira për sportistët dhe klubet, me synimin që bejzbolli dhe softbolli të fitojnë më shumë hapësirë në skenën sportive kosovare.
Për shumë njohës të sportit, Agim Keka përfaqëson një figurë me potencial dhe prezencë të veçantë sportive, pjesë e një gjenerate që u rrit në rrethana jo të lehta për sportin kosovar, por që ruajti gjithmonë respektin dhe reputacionin në komunitet. Sot, ai rikthehet me një mision të ri – të kontribuojë në zhvillimin dhe organizimin e një federate me perspektivë për të ardhmen.
