U prezantua Plani i Veprimit për Barazi Gjinore 2026–2029 në UKZ
Është prezantuar sot Plani i Veprimit për Barazi Gjinore 2026–2029 në Universitetin Publik “Kadri Zeka” në Gjilan, në kuadër të programit SHER.
Në fjalën hapëse, në emër të Rektorit të universitetit, Prof. Asoc. Dr. Artan Dërmaku, të pranishmit i përshëndeti Prorektorja për Zhvillim Akademik dhe Cilësi, Prof. Asoc. Dr. Voglushe Kurteshi, e cila theksoi rëndësinë e krijimit të politikave dhe mekanizmave institucionalë që promovojnë barazinë gjinore, gjithëpërfshirjen dhe mundësitë e barabarta në arsimin e lartë.
Nga programi SHER foli Shqiponjë Kodraliu, e cila vlerësoi angazhimin institucional të universitetit në hartimin dhe zbatimin e politikave që avancojnë barazinë gjinore dhe krijimin e një mjedisi të sigurt e gjithëpërfshirës për stafin dhe studentët.
Prezantimin e Planit të Barazisë Gjinore 2026–2029 e bëri Prorektorja Voglushe Kurteshi, duke paraqitur objektivat strategjike, aktivitetet dhe masat konkrete që synojnë avancimin e barazisë gjinore në universitet. Ajo tha se Plani është hartuar në përputhje me Statutin e Universitetit Publik “Kadri Zeka” dhe obligimet që dalin nga Ligji për Barazi Gjinore, ndërsa është mbështetur nga programi SHER.
Objektivat kryesore të Planit të rekomanduara nga Horizon Europe, përfshijnë krijimin e një mjedisi balancues punë-jetë, rritjen e përfshirjes gjinore në udhëheqje dhe vendimmarrje, përmirësimin e politikave për reduktimin e pabarazive gjinore, integrimin e perspektivës gjinore në programet e studimit dhe kërkimet shkencore, si dhe krijimin e një mjedisi të sigurt dhe dinjitoz për të gjithë.
Gjatë prezantimit u theksua se universiteti tashmë ka krijuar baza institucionale për promovimin e trajtimit të barabartë dhe respektimin e të drejtave të stafit dhe studentëve, duke përfshirë mekanizma për këshillim, mbështetje dhe promovim të një mjedisi pune gjithëpërfshirës.
Po ashtu, u prezantuan të dhëna lidhur me strukturën gjinore të stafit akademik, administrativ dhe studentëve, ku u evidentua përfaqësim i konsiderueshëm i grave në komunitetin universitar, si dhe nevoja për fuqizim të mëtejmë të rolit të grave në pozita vendimmarrëse dhe udhëheqëse.
Ndërsa Prof. Dr. Ardiana Gashi, eksperte vendore nga Programi SHER u dha pergjigje pytjeve në kuadër të diskutimeve, lidhur me implementimin e planit dhe rëndësinë e zbatimit të politikave të barazisë gjinore në institucionet e arsimit të lartë.
