Kurti: Orkestra “Amadeus” na bëri krenarë me katër çmime në festivalin ndërkombëtar në Pragë
Kryeministri në detyrë i Kosovës, Albin Kurti, ka përgëzuar Orkestrën e Fëmijëve dhe të Rinjve “Amadeus” nga Prishtina për suksesin e arritur në festivalin ndërkombëtar “Musica Orbis”, i mbajtur në Pragë të Çekisë.
Përmes një postimi në rrjetet sociale, Kurti ka vlerësuar se arritjet e orkestrës janë një tjetër dëshmi e talentit dhe përkushtimit të të rinjve kosovarë në skenën ndërkombëtare.
Sipas tij, orkestra u rikthye në Kosovë me katër çmime, përkatësisht medaljen e artë, dy çmime speciale individuale dhe çmimin e publikut, duke e bërë krenar të gjithë vendin.
“Pas sukseseve të jashtëzakonshme në Austri dhe në Spanjë, fëmijët dhe të rinjtë tanë u kthyen nga Çekia në Kosovë me medaljen e artë, dy çmime speciale individuale dhe atë të publikut”, ka shkruar Kurti.
Ai ka theksuar se këto rezultate dëshmojnë se talenti, kur shoqërohet me punë dhe përkushtim, sjell suksese të vazhdueshme, duke shtuar se Qeveria ka pasur mundësinë t’i mbështesë të rinjtë në përfaqësimin dinjitoz të Kosovës në festivalet ndërkombëtare të zhvilluara këtë vit në Spanjë dhe Çeki.
Në fund, kryeministri ka uruar edhe një herë Orkestrën “Amadeus” për suksesin e arritur, duke e cilësuar atë si një krenari për Kosovën.
