“Largpamësi Rama” – Opinion nga Silvana Begaj, Stokholm
Meqë na thatë se koncerti i Kanye West ishte një investim i shkëlqyer për imazhin e Shqipërisë dhe ekonominë, tani është koha të shohim rezultatet edhe në jetën e qytetarëve.
A do të zëvendësohen paratë e marra nga buxheti i shtetit për këtë koncert? A do të ketë një rezultat të prekshëm për qytetarët nga ky “sukses”? A do të ketë ilaçe të mjaftueshme për të sëmurët me sëmundje të rënda? A do të kenë pensionistët një pension dinjitoz? A do të ketë drejtësi për pronarët e ligjshëm, që presin prej vitesh në dyert e gjykatave? A do të plotësohen nevojat bazike për njerëzit në nevojë?
Pse nuk konsideroni të filloni procedurën për asociimin e Shqipërisë me të drejta të plota në programin Erasmus+, ashtu si janë Turqia, Maqedonia e Veriut, Serbia etj.? Mendoj se Kanye West mund të priste dhe këto para të investoheshin në fondet evropiane, ku shumë shkolla, organizata dhe të rinj shqiptarë do të përfitonin fonde dhe do të zhvillonin arsimin formal dhe joformal.
E di që edhe kjo kërkon kohë dhe punë, ashtu siç e di se mendja e një largpamësi si Ju nuk merret me vogëlsira, por po mendon për ndonjë ide tjetër brilante për të tërhequr vëmendjen.
Reagimi më i bukur dhe më qytetar vjen nga njerëzit e ndershëm, të vjedhur dhe të kequdhëhequr!
Të lutem, nëse marr review negative në këtë postim, jepni urdhër t’i procedojnë penalisht! Ligji vlen për të gjithë.
Shënim i Redaksisë:
Opinionet e autorëve nuk përfaqësojnë domosdoshmërisht qëndrimet apo politikën redaktuese të TV Gjilani. Ato janë përgjegjësi ekskluzive e autorëve. TV Gjilani mbetet i hapur për publikimin e qëndrimeve, vlerësimeve dhe opinioneve të ndryshme në rubrikën e dedikuar “Opinione”, duke respektuar pluralizmin e mendimit dhe lirinë e shprehjes.
