Drejtoria për Gjeodezi lë objektin e Shkollës së Bujqësisë, zhvendoset në lokacion të ri pranë Stacionit të Zjarrfikësve
Qytetarët e Gjilanit do t’i marrin tashmë shërbimet e Drejtorisë për Gjeodezi, Kadastër dhe Pronë (DGJKP) në një lokacion të ri dhe më të përshtatshëm, pas vendimit për zhvendosjen e kësaj drejtorie në objektin komunal pranë Stacionit të Zjarrfikësve.
Pas disa vitesh funksionimi në objektin e Shkollës së Bujqësisë, ku ishte transferuar përkohësisht për shkak të punimeve në ish-objektin e Komunës së Gjilanit, drejtoria është rikthyer tashmë në një hapësirë më funksionale ne qytet dhe më të lehtë për t’u casje nga qytetarët.
Sipas njoftimit zyrtar, zyrat e Drejtorisë për Gjeodezi, Kadastër dhe Pronë janë vendosur në katin e dytë të objektit të Departamentit të Pensioneve, pranë Stacionit të Zjarrfikësve, në afërsi të Stacionit të Autobusëve në Gjilan.
Zhvendosja synon të përmirësojë qasjen e qytetarëve në shërbimet kadastrale dhe pronësore, duke ofruar kushte më të mira pune për administratën dhe një ambient më funksional për pranimin dhe trajtimin e kërkesave të qytetarëve.
Nga drejtoria bëjnë të ditur se, pavarësisht ndryshimit të lokacionit, angazhimi për ofrimin e shërbimeve cilësore mbetet i pandryshuar.
“Me qëllim që të jemi sa më afër qytetarëve dhe që shërbimet tona të jenë më të qasshme, kemi bërë zhvendosjen në një lokacion më të përshtatshëm. Së bashku me ekipin e drejtorisë do të vazhdojmë punën me përkushtim dhe përgjegjësi, duke u angazhuar çdo ditë që të gjithë qytetarët, pa dallim, të kenë qasje më të lehtë dhe më efikase në shërbimet tona”, thuhet në njoftimin e DGJKP-së.
Drejtoria për Gjeodezi, Kadastër dhe Pronë është një nga sektorët më të frekuentuar të administratës komunale, pasi ofron shërbime që lidhen me regjistrimin e pronës, dokumentacionin kadastral, certifikatat pronësore, procedurat e trashëgimisë, bartjen e pronësisë dhe një sërë shërbimesh të tjera administrative që prekin drejtpërdrejt interesat e qytetarëve dhe bizneseve.
Me këtë zhvendosje, Komuna e Gjilanit synon të rrisë efikasitetin e administratës dhe të lehtësojë qasjen e qytetarëve në shërbimet publike, duke ofruar një ambient më të përshtatshëm dhe më funksional për ofrimin e tyre.
