Artisti Zeqirija Rexhepi hap ekspozitën personale në Berat
Në Galerinë e Arteve “Edward Lear”, pranë Qendrës Kulturore “Margarita Tutulani” në Berat, është hapur ekspozita personale e artistit Zeqirija Rexhepi, e cila prezanton mbi 40 vepra artistike.
Punimet e ekspozuara përfaqësojnë një trashëgimi të pasur emocionale, të ndërtuar mbi përjetimet e jetës dhe të shprehur përmes një gjuhe të veçantë artistike. Me teknikë të gjallë, kompozim energjik dhe ngjyra ekspresive, veprat ndërthurin figura muzikantësh të stilizuar me ndjenjën e nostalgjisë, duke krijuar një ritëm të fuqishëm vizual që fton vizitorin në reflektim dhe emocion.
Ekspozita do të qëndrojë e hapur për publikun deri më 12 korrik 2026, duke u ofruar artdashësve mundësinë të njihen nga afër me krijimtarinë artistike të Zeqirija Rexhepit.
