Gjilani synon avancimin e shërbimeve shëndetësore, Hyseni dhe Vitia diskutojnë projektet e ardhshme
Kryetari i Komunës së Gjilanit, Alban Hyseni, ka zhvilluar një takim me ministrin e Shëndetësisë, Arben Vitia, ku në qendër të diskutimeve kanë qenë projektet e reja që synojnë përmirësimin e sektorit të shëndetësisë në komunë.
Gjatë takimit është biseduar për koordinimin ndërinstitucional dhe vazhdimin e bashkëpunimit ndërmjet nivelit lokal dhe atij qendror, me qëllim realizimin e investimeve që ndikojnë në përmirësimin e kujdesit parësor shëndetësor.
Kryetari Hyseni ka bërë të ditur se përmes mbështetjes së Qeverisë së Kosovës po vazhdon puna në projekte që synojnë modernizimin e infrastrukturës shëndetësore dhe krijimin e kushteve më të mira për qytetarët.
Ai ka theksuar se prioritet mbetet rritja e cilësisë së shërbimeve shëndetësore, duke investuar në ambiente më funksionale dhe në krijimin e kushteve më të favorshme për stafin mjekësor dhe pacientët.
Sipas Hysenit, bashkëpunimi me Ministrinë e Shëndetësisë do të vazhdojë edhe në periudhën në vijim, me fokus realizimin e projekteve konkrete që kontribuojnë në zhvillimin e sistemit shëndetësor në Gjilan.
