Sulmi ndaj ekipit të RTV Dukagjini: reagime në Gjilan
Gazetarja Blerta Zuka dhe kameramani Enkelej Shaljani nga RTV Dukagjini janë sulmuar gjatë ushtrimit të detyrës në Gjilan, teksa po realizonin një kronikë për punimet në sheshin e qytetit.
Rasti ka ndodhur të enjten, më 25.06.2026, ndërsa sipas Drejtorit të Informacionit në RTV Dukagjini, Dibran Istrefi, dyshohet se sulmi është kryer nga një punonjës i kompanisë së angazhuar në punime në atë zonë. Istrefi e ka dënuar ashpër rastin, duke e cilësuar si të papranueshëm dhe të shëmtuar.
Edhe televizioni RTV Dukagjini ka reaguar, duke e cilësuar sulmin si cenim të drejtpërdrejtë të lirisë së medias dhe punës së gazetarëve, duke kërkuar nga institucionet kompetente që rasti të trajtohet me seriozitet dhe të ndërmerren veprimet e nevojshme ligjore.
Ndërkohë, kanë ardhur reagime edhe nga subjektet politike në Gjilan.
LDK – dega në Gjilan ka dënuar sulmin ndaj ekipit të RTV Dukagjinit, duke e cilësuar si cenim të lirisë së medias dhe të drejtës për informim. Në reagim theksohet se gazetarët duhet të punojnë të lirë nga çdo presion apo pengesë, ndërsa kërkohet transparencë për projektet publike dhe trajtim institucional i rastit.
PDK – dega në Gjilan e ka dënuar gjithashtu sulmin dhe pengimin e ekipit të RTV Dukagjinit gjatë punës. Në reagim thuhet se është e papranueshme që gazetarët të përballen me presione gjatë raportimit për projekte publike, duke kërkuar nga institucionet që rasti të trajtohet me seriozitet dhe duke theksuar se liria e medias është e paprekshme.
Pritet që rasti të marrë vëmendje edhe nga institucione dhe organizata të tjera që mbrojnë lirinë e medias.
