Rrahje mes pesë personave në Aeroportin e Prishtinës, përfundojnë në mbajtje

Pesë persona dyshohen se janë përfshirë në një rrahje pas një mosmarrëveshjeje në Aeroportin Ndërkombëtar të Prishtinës “Adem Jashari”.

Sipas raportit 24-orësh të Policisë së Kosovës, ngjarja ka ndodhur mbrëmjen e së mërkurës, rreth orës 20:30, në hapësirat e aeroportit. Pas incidentit, policia ka ndërmarrë veprimet e nevojshme hetimore dhe të dyshuarit janë shoqëruar në stacion policor.

Pas intervistimit të tyre, me vendim të prokurorit të rastit, të pesë të dyshuarit janë dërguar në mbajtje, ndërsa rasti është duke u trajtuar nga organet kompetente.

Policia nuk ka bërë të ditur shkaqet që çuan deri te mosmarrëveshja, as nëse nga përleshja ka pasur persona të lënduar. Rrethanat e plota të incidentit pritet të sqarohen pas përfundimit të hetimeve.

Në raportin e Policisë thuhet: “ANP ‘Adem Jashari’, 24.06.2026 – 20:30. Raportohet se pas një mosmarrëveshjeje pesë të dyshuar meshkuj kosovarë janë rrahur mes vete. Me vendim të prokurorit, të dyshuarit pas intervistimit dërgohen në mbajtje.”