Kamenicë: Mbahet konsultimi publik për Kornizën Afatmesme Buxhetore 2027-2029
Kuvendi Komunal në bashkëpunim me Drejtorinë për Buxhet dhe Financa mbajti konsultimin publik për Kornizën Afatmesme (Buxhetore) të Shpenzimeve 2027-2029.
Në takim morën pjesë Kryesuesja e Kuvendit, Arbnore Beqiraj-Fera, Drejtoresha e Drejtorisë për Buxhet dhe Financa, Arditë Dërmaku, Zyrtari Certifikues / Aprovues në Drejtorinë për Buxhet dhe Financa, Selami Zylfiu, Zyrtari për Buxhet dhe Financa, Labinot Dërmaku, Drejtorë të Drejtorive Komunale, zyrtarë komunal dhe të tjerë.
Kryesuesja e Kuvendit Komunal, Arbnore Beqiraj-Fera, theksoi rëndësinë e Kornizës Afatmesme Buxhetore si dokument që paraqet planifikimet financiare të komunës për tri vitet e ardhshme.
Drejtoresha për Buxhet dhe Financa, Arditë Dërmaku, prezantoi procesin e hartimit dhe miratimit të dokumentit, si dhe limitet buxhetore të përcaktuara nga Ministria e Financave.
Sipas projeksioneve, buxheti i planifikuar për vitin 2027 është 15.3 milionë euro, ndërsa mjetet janë planifikuar për paga, mallra dhe shërbime, subvencione, shpenzime komunale dhe investime kapitale.
Zyrtari Certifikues/Aprovues, Selami Zylfiu, prezantoi strukturën e dokumentit dhe sqaroi planifikimet buxhetore për periudhën 2027-2029.
U theksua se për vitin 2027 nuk është paraparë asnjë shkurtim i stafit në administratën komunale.
Gjatë konsultimit u diskutua për projeksionet e të hyrave vetanake, subvencionet, grantet për arsim dhe shëndetësi, si dhe mundësitë për krijimin e fondeve rezervë për raste emergjente.
Qytetarët dhe pjesëmarrësit patën mundësi të parashtrojnë pyetje dhe të japin sugjerimet e tyre lidhur me planifikimin buxhetor të komunës.
Konsultimi përfundoi me diskutime konstruktive dhe kontribut të pjesëmarrësve në procesin e planifikimit të buxhetit komunal për vitet 2027-2029. Të gjitha pyetjet, komentet, sugjerimet dhe kërkesat e paraqitura gjatë konsultimit publik do të përfshihen në raportin përfundimtar të konsultimit.
