UKZ mirëpriti ekipin e AKA-së për riakreditimin e programit Shkenca Kompjuterike
Në Universitetin Publik “Kadri Zeka” është zhvilluar vizita zyrtare e ekipit të ekspertëve të Agjencisë së Kosovës për Akreditim në kuadër të procesit të riakreditimit të programit Bachelor në Shkenca Kompjuterike.
Gjatë vizitës, ekspertët zhvilluan takime me menaxhmentin e fakultetit, bartësit e programit, stafin akademik dhe administrativ, studentët, të diplomuarit, si dhe me përfaqësues të tregut të punës dhe partnerë të jashtëm. Po ashtu, u realizua edhe vizita në laboratorë dhe hapësirat mësimore të Fakultetit të Shkencave Kompjuterike.
Ekipi i ekspertëve përbëhej nga Maurizio Ferrari Dacrema me pjesëmarrje fizike, kurse Emmanouil Panaousis dhe Issabek Muratov në lidhje online, ndërsa procesi u koordinua nga nga Shkelzen Gërxhaliu Drejtor i Departamentit për Monitorim dhe Procedura pas Akredituese në Agjencia e Kosovës për Akreditim.
Dekanja e Fakultetit të Shkencave Kompjuterike, Aferdita Ibrahimi, theksoi rëndësinë e këtij procesi për avancimin e vazhdueshëm të cilësisë akademike.
“Riakreditimi i programit të Shkencave Kompjuterike është një proces shumë i rëndësishëm për fakultetin tonë dhe për universitetin në përgjithësi. Ne mbetemi të përkushtuar në ofrimin e një programi bashkëkohor, të harmonizuar me kërkesat e tregut të punës dhe standardet ndërkombëtare të arsimit të lartë,” u shpreh dekanja Ibrahimi.
Dekanja Ibrahimi shtoi se Fakulteti i Shkencave Kompjuterike do të vazhdojë të investojë në ngritjen e cilësisë në mësimdhënie, kërkime shkencore dhe bashkëpunim me industrinë e teknologjisë informative.
