Shkurte Fejza takon Bill Clinton në SHBA: “Mirënjohje nga zemra në emër të popullit të Kosovës”
Këngëtarja Shkurte Fejza ka ndarë një mesazh emocionues në rrjetet sociale pas takimit që zhvilloi në Shtetet e Bashkuara me ish-presidentin amerikan, Bill Clinton.
Fejza e cilësoi takimin si një moment të veçantë mirënjohje për rolin historik që Clinton pati për Kosovën në periudhën më të vështirë të popullit shqiptar.
“Në emrin tim dhe në emër të gjithë atyre që e bartin Kosovën në zemër, dje në Shtetet e Bashkuara pata nderin e veçantë të takoj Presidentin Bill Clinton”, shkroi ajo në Facebook.
Sipas saj, ky takim ishte “më shumë se simbolik. Ishte një moment falënderimi dhe mirënjohje të thellë për gjithçka që Presidenti Clinton ka bërë për Kosovën, për vendimin historik, për guximin moral dhe për qëndrimin e palëkundur në anën e së drejtës, në ditët më të errëta të popullit tonë. Pa atë angazhim vendimtar, liria jonë do të kishte një histori tjetër”.
Këngëtarja falënderoi edhe shqiptarët e Amerikës për kontributin dhe mbështetjen e vazhdueshme ndaj Kosovës ndër vite, duke i quajtur ata “zemra e gjallë e shqiptarizmës, zëri ynë i palëkundur në kohë rreziku dhe shtylla e fuqishme e miqësisë së përhershme mes Kosovës dhe Shteteve të Bashkuara”.
“Sepse liria e Kosovës mban edhe emrin e ndërgjegjes amerikane, dhe ky emër do të kujtohet përjetë me mirënjohje dhe nder”, përfundoi Fejza.
Postimi mban datën 17 qershor 2026 dhe është publikuar nga Nju Jorku.
