Pas kritikave për mosdhënien e pikëve Kroacisë, reagon kryetarja e jurisë serbe
Këngëtarja dhe kompozitorja Aleksandra Kovaç, e cila këtë vit kryesoi jurinë profesionale të Serbisë në Eurovision, ka reaguar pas kritikave të shumta që shpërthyen në rrjetet sociale, pasi juria serbe nuk i dha asnjë pikë Kroacisë, ndërsa juria kroate e vlerësoi Serbinë me 12 pikë.
Përmes një postimi në Instagram, Kovaç theksoi se votimi është bërë mbi baza profesionale dhe artistike, duke mohuar çdo ndikim politik në vendimmarrje.
“Kam pasur nderin të jem kryetare e jurisë serbe në Eurovision 2026. Që në fillim kam insistuar që votimi të bëhet vetëm mbi kriteret muzikore dhe jo politike, sepse detyra jonë ishte të vlerësonim këngët dhe performancat, e jo të merreshim me politikë të lirë”, ka deklaruar ajo.
Sipas saj, secili anëtar i jurisë ka votuar në mënyrë të pavarur, pa koordinim me pjesën tjetër të ekipit.
“Secili ka dhënë vlerësimin e vet profesional. Madje, jemi marrë vesh që askush të mos i dijë votat e të tjerëve, në mënyrë që të mos ndikojmë tek njëri-tjetri”, shtoi Kovaç.
Ajo ka shprehur mbështetje edhe për përfaqësuesit serbë në Eurovision, grupin “Lavina”, duke vlerësuar performancën e tyre në skenë.
“Kemi bërë tifo me gjithë zemër për djemtë tanë, të cilët patën një paraqitje të jashtëzakonshme dhe treguan energji të madhe në skenë”, u shpreh ajo.
Përveç Aleksandra Kovaçit, pjesë e jurisë profesionale serbe për Eurovision 2026 ishin edhe Jelena Tomašević, Marija Marić, Lora Hrkalović, Ivan Mileusnić, Mateja Blažić dhe Dušan Alagiç, shkruan mediumi kroat, Index.hr.
