Zekirija Ramadani pas titullit: “Sukses i përbashkët, meritë e lojtarëve dhe klubit”

Pas konfirmimit të titullit kampion të Dritës tri xhiro para fundit të Albi Mall Superligës së Kosovës për edicionin 2025/2026, trajneri Zekirija Ramadani ka theksuar se suksesi është rezultat i një pune të madhe kolektive gjatë gjithë sezonit.

“Ndeshje të vështira, një edicion i ngjeshur me shumë rrugëtime dhe sakrifica, por ky është një menaxhim i mirë nga të gjithë ne – nga drejtuesit, te stafi teknik dhe deri te futbollistët. Unë jam i bindur që edhe ju do t’i vlerësoni futbollistët, sepse djersa e derdhur e tyre sot na shpalli kampionë”, ka thënë Ramadani.

Ai ka shtuar se vlerësimet individuale për të janë gjithmonë rezultat i punës së ekipit: “Për mua është hera e pestë që futbollistët më bëjnë trajner të vitit, por unë nuk e bëj veten – ata janë arsyeja e këtij suksesi.”