Baleti Kombëtar i Kosovës prezanton “Carmina Burana” në Bogotá të Kolumbisë
Baleti Kombëtar i Kosovës do të sjellë në skenën ndërkombëtare shfaqjen e njohur “Carmina Burana” në kryeqytetin kolumbian Bogotá, në kuadër të turneut në Amerikën Qendrore dhe Latine.
Shfaqja është planifikuar të mbahet më 21 maj në Teatro Municipal Jorge Eliécer Gaitán, një prej teatrove më prestigjiozë në Kolumbi, ku publiku vendas do të ketë mundësinë të ndjekë një nga veprat më të njohura të repertorit botëror të baletit dhe muzikës klasike.
Ky aktivitet vjen si pjesë e një turneu ndërkombëtar që përfshin El Salvadorin dhe Kolumbinë, duke shënuar një moment të rëndësishëm në prezantimin dhe afirmimin e Baletit Kombëtar të Kosovës në skenën globale.
Përmes kësaj paraqitjeje, institucioni vazhdon të forcojë praninë e tij ndërkombëtare dhe të promovojë artin koreografik kosovar në skena prestigjioze botërore.
