“Kosova pushton Bundesligën” – Hoffenheim nxjerr në pah katërshen shqiptare pas spektaklit ndaj Augsburgut
Një mbrëmje e veçantë për futbollistët kosovarë në Bundesliga ka ardhur të premten, ku përballja mes FC Augsburg dhe TSG Hoffenheim përfundoi me rezultat të barabartë 2-2.
Përtej rezultatit, kjo ndeshje mori vëmendje të madhe për një arsye të veçantë: praninë e katër futbollistëve nga Kosova në fushë.
Te vendasit u paraqit Elvis Rexhbecaj, ndërsa te mysafirët nga Hoffenheim luajtën Fisnik Asllani, Leon Avdullahu dhe Albian Hajdari.
Pas përfundimit të takimit, katër reprezentuesit dardanë janë takuar dhe kanë qëndruar së bashku, duke shënuar një moment simbolik jashtë fushës.
Ky moment nuk kaloi pa u vënë në pah edhe nga vetë klubi i TSG Hoffenheim, i cili publikoi një fotografi të tyre në rrjetet sociale me përshkrimin “Ekipi i Kosovës”.
Kjo përballje jo vetëm që solli spektakël në fushë, por edhe dëshmoi edhe një herë rritjen e ndikimit të futbollistëve kosovarë në elitën e futbollit gjerman.
