“Java e Frankofonisë” vazhdon në Gjilan – Hyseni: Gjilani po afirmohet si qendër kulturo-artistike 🇫🇷
Kanë vazhduar aktivitetet e “Javës së Frankofonisë”, në Gjilan.
Një mbrëmje muzikore elegante dhe plot emocione u zhvillua në sallën koncertale të Shkollës së Muzikës, ku u prezantua vepra e Reynaldo Hahn “Ora e shkëlqyer” – “L’heure exquise”, me interpretimin e mezzo-sopranos Fiona Shabani, piano nga Lirika Pula dhe aktore Albulena Bokshi.
Ky koncert promovoi pasurinë e kulturës frankofone dhe solli një përvojë unike artistike për publikun.
Po ashtu, nxënësit e Gjimnazit Natyror “Xhavit Ahmeti” dhe atij Shoqëror “Zenel Hajdini” realizuan aktivitetin “Më thuaj dhjetë fjalë të botës që do të vijë” – “Dis-moi dix mots d’un monde à venir”, duke sjellë kreativitetin e tyre përmes gjuhës dhe letërsisë.
Kryetari i Komunës së Gjilanit, Alban Hyseni, theksoi se koncerti letrar dhe muzikor “L’Heure exquise” ishte një udhëtim magjepsës përmes veprave të Reynaldo Hahn. Ai përgëzoi artistët për performancën e tyre të nivelit të lartë dhe shtoi:
“Gjilani po dëshmon çdo ditë e më shumë se është një qendër e rëndësishme kulturore, ku arti dhe gjuha universale e muzikës na bashkojnë me vlerat më të larta evropiane.”
Hyseni bëri thirrje që qytetarët të jenë sërish në teatër të shtunën, më 28 mars, në orën 20:00, për shfaqjen “Le Mensonge” (Gënjeshtra).
Nga ana tjetër, ambasadori i Francës në Kosovë, Olivier Guérot, vlerësoi se për çdo vit në Kosovë organizohet “Java e Frankofonisë”, dhe sivjet nderi i këtij aktiviteti i ka takuar Gjilanit si “Kryeqytet i Frankofonisë”.
