“God Bless America” trazon publikun në natën e katërt të Festivalit “Talia e Flakës 2026”
Festivali i Dramës Origjinale Shqipe “Talia e Flakës 2026” ka vijuar në natën e katërt me shfaqjen “God Bless America”, me tekst dhe regji të Fatos Berishës, jashtë konkurrencës. Edhe pse disa repriza ishin dhënë më parë, salla ishte e mbushur, duke dëshmuar interesin e publikut për këtë realizim skenik.
Shfaqja rrëfen historinë e katër shokëve që, pas një trajnimi nga një menaxher biznesi dhe udhëzimeve nga kisha, nisen nëpër shtete të Amerikës për të shitur Bibla dhe materiale religjioze. Përpjekjet e tyre përbëhen nga një mori situatash komike dhe dramatike, ku dështimi për shkak të bindjeve fetare, miratimit të bashkëshortes apo rrethanave shoqërore shfaqet në mënyrë të përsëritur, duke krijuar kulmin dramaturgjik të shfaqjes.
Në epilog, një akt spontan solidarizimi gjatë një udhëtimi personal zbulon ironinë e fatit dhe sugjeron se kuptimi njerëzor shpesh shfaqet përtej kalkulimeve të interesit.
Ekipi i aktorëve, me përvojën e tyre profesionale, ruan relacion të vazhdueshëm me publikun, duke e ngritur shfaqjen në një nivel më të lartë interpretativ. Në këtë realizim morën pjesë: Avni Shkodra, Kushtrim Qerimi, Gani Rrahmani, Ali Demi, Aurita Agushi, Alban Shahiqi, Artan Selimi, Bashkim Nexhipi, Safete Mustafa-Baftiu, Mejreme Berisha, Tringa Hasani dhe Florent Salihu.
Edhe këtë natë të katërt nuk munguan zyrtarët institucionalë, përfshirë kryesuesen e Kuvendit Komunal të Gjilanit, Krenare Latifi – Kqiku, ndërsa gjatë ditëve të kaluara festivalin e vizituan edhe përfaqësues të tjerë, përfshirë ministrin e MKRS-së, Hajrullah Çeku, duke dëshmuar mbështetjen e vazhdueshme institucionale.
Në natën përmbyllëse, më 28 janar, publiku do të ndjekë shfaqjen “Gërrdia” nga Trupa e Teatrit Kombëtar të Kosovës, me autorësi dhe regji të Astrit Kabashit. Në skenë interpretojnë: Bujar Ahmeti, Maylinda Kosumovic dhe Rebeka Qena, me skenografi nga Arben Shala, kostumografi Yllka Brada dhe muzikë nga Memli Kelmendi.
Programi vijon më 29 janar me “Yjet e Flakës”, festivali i këngëve për fëmijë dhe koncertin e këngëve të Jusuf Gërvallës, ndërsa 30 janar pason “Fest Flaka”, festivali i këngës shqipe. Manifestimi përfshin gjithashtu aktivitete letrare e enigmatike më 31 janar dhe përmbyllet me Gala Mbrëmjen, ku shpallen fituesit në të gjitha kategoritë artistike dhe krijuese të “Flaka e janarit 2026”.
