Shkresa e MKRS drejtuar FFK-së, reagon Taulant Hodaj
Ish-sekretari i FFK-së, Taulant Hodaj flet për shkresën e MKRS-së drejtuar Federatës së Futbollit, thotë se FFK duhet të jetë më transparente dhe se rrezikojmë të jemi shembulli më negativ në UEFA.
Postimi i tij i plotë:
⚖️Ligjshmëria dhe demokracia në funksionimin e Federatës së Futbollit të Kosovës nuk janë zgjedhje, janë detyrim ligjor. 🇽🇰⚽
Si ish Sekretar i Përgjithshëm i FFK-së dhe pjesë e komunikimeve institucionale me UEFA-n dhe FIFA-n gjatë viteve 2022–2023, e konsideroj të drejtë, të vonuar dhe të domosdoshme shkresën e fundit të Ministrisë së Kulturës, Rinisë dhe Sportit drejtuar Federatës së Futbollit të Kosovës, lidhur me ligjshmërinë dhe transparencën në FFK.
📌 Çështjet e ngritura në këtë shkresë – përfshirë anëtarësinë, përbërjen e Kuvendit, si dhe standardet e transparencës dhe demokracisë, janë identifikuar prej kohësh si mospërputhje serioze me Ligjin për Sport në Kosovë dhe me statutet e UEFA-s dhe FIFA-s. Ka pasur kërkesa të qarta nga MKRS, UEFA dhe FIFA që këto çështje të adresohen menjëherë pas licencimit të FFK-së në vitin 2023, por fatkeqësisht ato janë injoruar nga udhëheqja aktuale e FFK-së.
📝 Si një nga draftuesit e Statutit të FFK-së, e them me përgjegjësi se në vitin 2023, me insistim të kryetarit aktual të FFK-së, janë lënë në fuqi disa dispozita qartësisht të kundërligjshme, me premtimin se brenda një afati prej gjashtë (6) muajsh do të rregulloheshin dhe do të harmonizoheshin me standardet e kërkesat e qeverisjes së mirë të UEFA-s dhe FIFA-s, si dhe me kërkesat ligjore në Kosovë. Këto kërkesa eksplicite, përfshirë edhe ato nga UEFA dhe FIFA – janë të dokumentuara përmes komunikimeve zyrtare me shkrim, ku është kërkuar që këto mospërputhje të adresohen pa vonesë. Megjithatë, pas arrestimit të kryetarit aktual të FFK-së në atë kohë, këto çështje u shtynë, u kamufluan dhe nuk u trajtuan asnjëherë.
🔍 Në këtë kontekst, është e rëndësishme të sqarohet se pretendimet për “përzierje të politikës në sport” apo për “ndërhyrje të UEFA/FIFA-s” janë një kamuflim i rremë, i përdorur për të ruajtur pushtetin me çdo mjet. Në realitet, këto kërkesa janë vetë kërkesa të UEFA-s dhe FIFA-s, pasi pikërisht në këto pjesë Statuti i FFK-së është në kundërshtim të plotë me standardet e tyre. Ashtu si çdo federatë tjetër, edhe FFK fillimisht duhet të jetë në harmoni me ligjin e vendit dhe me standardet e organizatave ndërkombëtare ku bën pjesë.
⏳Tentimi për mbajtjen e zgjedhjeve para ciklit të rregullt katërvjeçar dhe në prag të ndeshjeve të rëndësishme të Kombëtares së Kosovës përbën një përpjekje për kamuflim të procesit zgjedhor, imponim të status quo-së dhe shpërqendrim nga dy ndeshjet më të rëndësishme të Kombëtares sonë.
🚫 Sot, FFK është ndër federatat e rralla në botë dhe e vetmja në Evropë, ku vetëm për të kandiduar për kryetar kërkohet mbështetje me nënshkrime nga rreth 50% e anëtarëve (klubeve) të licencuara, një mekanizëm që në praktikë shërben për eliminimin e konkurrencës dhe ruajtjen e pushtetit në mënyrë të kundërligjshme dhe me çdo mjet.
🏛️ Është koha e fundit që në Federatën e Futbollit, si organizata kryesore e sportit në Kosovë, të lejohet transparenca, profesionalizmi dhe qeverisja demokratike. Përndryshe, rrezikojmë të vazhdojmë të jemi shembulli më negativ si anëtar I UEFA-së.
✅ Mbajtja e zgjedhjeve pa këtë harmonizim nuk i shërben as futbollit dhe as integritetit institucional. Respektimi i ligjit, qeverisja e mirë e Federatës dhe zhvillimi sipas standardeve të UEFA-s janë në interes të klubeve, lojtarëve dhe futbollit të Kosovës në tërësi.
⚽🇽🇰 Kërkesa për transparencë dhe ligjshmëri nuk është kundër futbollit, përkundrazi, është në interes të futbollit, si pjesë e rëndësishme e sportit dhe shoqërisë në Kosovë, e cila ka kapacitete reale për ta bërë Kosovën krenare në arenën ndërkombëtare.
