Rektori i UKZ-së ka vizituar Komunën e Kamenicës
Rektori i Universitetit Publik “Kadri Zeka”, Prof. Asoc. Dr. Artan Dërmaku, ka realizuar një vizitë zyrtare në Komunën e Kamenicës, ku është pritur në takim nga Kryetari i Komunës, z. Kadri Rahimaj.
Gjatë takimit, Rektori Dërmaku dhe Kryetari Rahimaj kanë diskutuar për vazhdimin dhe thellimin e bashkëpunimit ndërmjet Universitetit Publik “Kadri Zeka” dhe Komunës së Kamenicës, me fokus në realizimin e projekteve të përbashkëta në fushën e arsimit, zhvillimit lokal dhe përfshirjes së të rinjve.
Në fjalën e tij, Rektori i UKZ-së, Prof. Asoc. Dr. Artan Dërmaku, theksoi rëndësinë e bashkëpunimit me institucionet lokale, duke vlerësuar mbështetjen e deritanishme të Komunës së Kamenicës ndaj universitetit.
“Universiteti Publik “Kadri Zeka” i kushton rëndësi të veçantë bashkëpunimit me institucionet lokale, pasi vetëm përmes partneriteteve të qëndrueshme mund të kontribuojmë realisht në zhvillimin arsimor dhe shoqëror. Falënderoj Komunën e Kamenicës për bashkëpunimin e deritanishëm dhe dëshirojmë që ky bashkëpunim të vazhdoj edhe më tutje”, ka thënë ndër tjerash Rektori Dërmaku.
Po ashtu, Rektori Artan Dërmaku e uroi Kryetarin Kadri Rahimaj për marrjen e mandatit të dytë si Kryetar i Komunës së Kamenicës, duke i dëshiruar suksese në realizimin e objektivave të tij qeverisëse.
Nga ana e tij, Kryetari i Komunës së Kamenicës, z. Kadri Rahimaj, vlerësoi rolin e Universitetit Publik “Kadri Zeka” si partner strategjik në zhvillimin e komunës, duke shprehur gatishmërinë për vazhdimin e bashkëpunimit.
“Universiteti Publik ‘Kadri Zeka’ është një partner i rëndësishëm për Komunën e Kamenicës, veçanërisht në fushën e arsimit dhe zhvillimit të të rinjve. Komuna jonë mbetet e përkushtuar për të fuqizuar bashkëpunimin me universitetin, në mënyrë që të realizojmë iniciativa dhe projekte që sjellin përfitime konkrete për qytetarët,” theksoi Kryetari Rahimaj.
Në përfundim të takimit, të dyja palët shprehën vullnetin e përbashkët për të vazhduar dhe thelluar bashkëpunimin edhe në të ardhmen, në funksion të avancimit të arsimit të lartë dhe zhvillimit të qëndrueshëm të Komunës së Kamenicës.
