OKB: Viti 2025 në rrugë për t’u renditur ndër më të nxehtit në histori
Kombet e Bashkuara kanë njoftuar se viti 2025 pritet të jetë ndër më të nxehtit që janë regjistruar ndonjëherë, për shkak të temperaturave jashtëzakonisht të larta të shënuara këtë vit.
Sipas Agjencisë për klimën dhe motin të OKB-së, edhe pse ky vit nuk do ta kalojë 2024-ën si më i nxehti i regjistruar, ai do të renditet i dyti ose i treti, duke mbyllur një dekadë me nxehtësi të paprecedentë.
Raporti paralajmëron se ngrohja globale po e bën gjithnjë e më të vështirë kufizimin e temperaturave në 1.5°C, siç parashihet në Marrëveshjen e Parisit. Në të njëjtën kohë, përqendrimi i gazrave serrë dhe nxehtësia në oqeane kanë arritur nivele rekord.
OKB-ja thekson se periudha 2015–2025 është më e nxehta që kur janë nisur matjet meteorologjike, ndërsa ndikimi i temperaturave të larta po vërehet në shkrirjen e akullit dhe në ngjarjet ekstreme të motit në mbarë botën.
