Ambasadorët e NATO-s mblidhen në Prishtinë, mesazhe të forta për sigurinë
Komandanti i misionit të KFOR-it të udhëhequr nga NATO, gjeneralmajor Enrico Barduani, priti sot ambasadorët dhe krerët e misioneve të 33 aleatëve dhe partnerëve të NATO-s që kontribuojnë në Forcën e Kosovës, në Shtabin e KFOR-it në Kampin Film City, Prishtinë.
Ky takim, i treti gjatë mandatit të gjeneral Barduanit, shërbeu si një mundësi për shkëmbimin e pikëpamjeve mbi situatën e përgjithshme të sigurisë në Kosovë, si dhe mbi aktivitetet aktuale të KFOR-it në mbështetje të përpjekjeve të komunitetit ndërkombëtar.
“KFOR-i ka luajtur një rol vendimtar në kontributin për ruajtjen e një mjedisi të sigurt për të gjitha komunitetet që jetojnë në Kosovë. Falënderoj përfaqësuesit e të gjitha vendeve kontribuese me trupa të KFOR-it për mbështetjen e tyre kyçe në këtë drejtim. Ky është një dëshmi e angazhimit të palëkundur të Aleatëve dhe Partnerëve të NATO-s për stabilitetin rajonal,” nënvizoi gjeneral Barduani.
Komandanti i KFOR-it theksoi gjithashtu mbështetjen e vazhdueshme të KFOR-it për dialogun e lehtësuar nga Bashkimi Evropian midis Beogradit dhe Prishtinës, si kornizë për adresimin e çështjeve të pazgjidhura dhe për arritjen e zgjidhjeve të qëndrueshme në dobi të të gjitha komuniteteve.
KFOR-i vazhdon të japë kontribut të rëndësishëm për sigurimin e një mjedisi të qetë e të sigurt për të gjithë njerëzit dhe komunitetet në Kosovë, në përputhje me mandatin e saj.
Ky mandat zbatohet në koordinim të ngushtë me Policinë e Kosovës dhe Misionin e BE-së për Sundimin e Ligjit (EULEX), në kuadër të roleve të tyre përkatëse si reagues të sigurisë.
