Komuna e Vitisë shpërndan mekanizma bujqësor për 76 fermerë përfitues
Komuna e Vitisë ka vazhduar ciklin e përkrahjes për fermerët lokalë, duke shpërndarë mekanizma të rinj bujqësor.
Kryetari i komunës, Sokol Haliti, i shoqëruar nga drejtori për Bujqësi, Pylltari dhe Zhvillim Rural, Naim Pira, ka bërë shpërndarjen e 37 plugjeve, 30 rrotokosave, 5 mbjellëseve të patates dhe 4 nxjerrëseve të patates.
Me këtë rast, kryetari Haliti theksoi se është krenar për fermerët vitias dhe produktet që ata plasojnë në treg, duke shtuar se mbështetja e tyre me mekanizma të rinj ndikon drejtpërdrejt në zhvillimin ekonomik dhe gjenerimin e të hyrave. Ai po ashtu paralajmëroi se qeverisja lokale do të vazhdojë progresivisht përkrahjen për fermerët edhe në të ardhmen, duke shqyrtuar mundësitë për furnizim me mekanizma të tjerë bujqësor.
Nga ana tjetër, drejtori Naim Pira bëri të ditur se vlera e përgjithshme e mekanizmave të shpërndarë kalon shumën prej 75 mijë euro, prej të cilave 20% janë participim i vetë fermerëve, ndërsa pjesa tjetër është e mbuluar nga buxheti komunal. Ai falënderoi kryetarin Haliti për mbështetjen dhe e cilësoi këtë vit si një nga më të suksesshmit në furnizimin e fermerëve me mekanizma bujqësor.
