LVV në Gjilan konfirmon nominimin e Alban Hysenit për kryetar të Gjilanit
Lëvizja Vetëvendosje në Gjilan, e cila kohë më parë ka paralajmëruar, sot ka zyrtarizuar emrin e kandidatit për kryetar në zgjedhjet lokale të 12 tetorit 2025.
Ashtu sic është pritur e paralajmëruar e pritur, Alban Hyseni ka marrë besimin e plotë të qendrës në Gjilan.
“Këshilli i Qendrës së Lëvizjes VETËVENDOSJE! në Gjilan konfirmon fuqishëm mbështetjen për kandidaturën e Kryetarit të Qendrës, njëherit Kryetar i Komunës, Alban Hyseni për të vazhduar mandatin e dytë në udhëheqje të Gjilanit”. Shkruan faqja zyrtare e LVV-së.
Më tej theksohet se në mbledhjen e Këshillit të mbajtur sot, më 8 gusht 2025, delegatët kanë votuar për atë që e kanë cilësuar listë e fitores së 12 tetorit, për përfaqësuesit e Lëvizjes VETËVENDOSJE! në Kuvendin Komunal.
“Lista jonë përfaqeson vlera me njerëz të shquar të komunës sonë, profesionistë të dalluar në fushat e tyre, të cilët përfaqësimin me dinjitet kanë detyrë, ndërsa mirëqenia qytetare dhe zhvillimi i gjithëmbarshëm janë synimi ynë parësor. Vazhdojmë bashkë me qytetarët edhe katër vite tjera pune dhe progresi për Gjilanin”, thuhet më tej në njoftimin e postuar në faqen e LVV-së në Gjilan.
Vet z. Hyseni është shprehur mirënjohës e falënderues për besimin që ka marrë nga Qendra e LVV-së dhe kreu i LVV-se, gjegjësisht kryeministri Kurti.
“Jam thellësisht i nderuar dhe mirënjohës për përkrahjen e plotë të të gjitha strukturave të Lëvizjes VETËVENDOSJE!, nga Kryeministri Albin Kurti e deri te secili aktivist e anëtar, që u kurorëzua sonte me votim të Këshillit të Qendrës së Lëvizjes në Gjilan për të më konfirmuar zyrtarisht si kandidat për Kryetar të Gjilanit”, ka shkruar Hyseni.
