Përfaqësues të Fakultetit Ekonomik po qëndrojnë në vizitë zyrtare në Universitetin e Kastamonus në Turqi
Përfaqësues të Fakultetit Ekonomik në Universitetin Publik “Kadri Zeka” në Gjilan po qëndrojnë për vizitë zyrtare në Universitetin e Kastamonus në Turqi, në kuadër të projektit Erasmus+ International Credit Mobility, për mobilitetin e stafit akademik.
Gjatë kësaj vizite, Dekani i Fakultetit Ekonomik, Prof. Dr. Xhevat Sopi, dhe Prodekani, Prof. Ass. Dr. Lulzim Rashiti, po zhvillojnë një sërë aktivitetesh në Departamentin e Ekonomisë, në Fakultetin e Shkencave Ekonomike dhe Administrative të këtij universiteti turk.
Përfaqësuesit e UKZ-së janë pritur nga drejtues dhe akademikë të Universitetit të Kastamonus, Prof. Dr. Selahattin Kaymakci, Prorektor për projekte dhe bashkëpunim ndërkombëtar, Prof. Dr. Orhan Kandemir, Dekan i Fakultetit të Shkencave Ekonomike dhe Administrative dhe Doç. Dr. Omca Altin Prodekan, Dr. Yusuf Vara Abubakar nga Departamenti për Marrëdhënie Ndërkombëtare, Harun Koçak Asistent kërkimor në Departamentin për Marrëdhënie Ndërkombëtare, dhe Assoc. Prof. Dr. Gökhan Kaya Koordinator Institucional për Erasmus.
Gjatë vizitës, u mbajt edhe një prezantim para stafit akademik të Fakultetit të Ekonomisë, ku përfaqësuesit nga UKZ prezantuan aktivitetet akademike, kërkimore dhe ndërkombëtare të institucionit tonë.
Në takimet e zhvilluara, palët diskutuan rreth mundësive për zgjerimin dhe thellimin e bashkëpunimit dypalësh në fusha të ndryshme akademike dhe kërkimore. U theksua rëndësia e shkëmbimeve të ndërsjella të stafit dhe studentëve, si dhe ndërtimi i projekteve të përbashkëta ndërkombëtare në të ardhmen.
Po ashtu në këtë vizitë, Dekani Sopi dhe Prodekani Rashiti kanë takuar edhe stundenten e Fakuktetit të Shkencave Kompjuterike, Kaltrina Rushiti, e cila ndodhet në Universitetin e Kastamonus në kuadër të programit Erasmus për mobilitetitn e studentëve për një semestër.
