“Nëse nuk e dërgoj Gjilanin në Evropë, nuk qëndroj te klubi” – Premtimi i madh i Zekirija Ramadanit
Kryetrajneri i ri i SC Gjilanit nis sot punën zyrtarisht me ndeshjen ndaj Feronikelit.
GJILAN – Zekirija Ramadani është zyrtarisht trajneri i ri i SC Gjilanit dhe deklarata e tij e parë ka bërë bujë në opinionin sportiv.
Pasi u emërua në krye të bankinës kuqebardh, Ramadani ka dhënë një premtim të madh:
“Nëse nuk e dërgoj Gjilanin në Evropë këtë sezon, nuk do të vazhdoj të qëndroj te klubi.”
Deklarata është komentuar gjerësisht që nga dje, kur u bë zyrtare emërimi i tij. Ramadani vjen në Gjilan pasi më parë drejtonte bankinën e FC Dritës, me të cilën garoi edhe në eliminatoret e garave evropiane.
Tashmë ai kthehet në klubin ku synon të lërë gjurmë të thella.
Sprova e parë zyrtare e “Zekës” me Gjilanin është pikërisht sot, në ndeshjen që kuqebardhët zhvillojnë në stadiumin vendas ndaj Feronikelit.
Pritjet janë të mëdha nga tifozët dhe drejtuesit e klubit, ndërsa Ramadani me premtimin e tij ka vendosur objektivin qartë: Evropa.
SC Gjilani dhe stafi i ri teknik nisin kështu rrugëtimin e ri me ambicie të larta për këtë edicion.
