Akreditohet programi Master “Mësimdhënie e Gjuhës Angleze” në Universitetin Publik “Kadri Zeka”
Universiteti Publik “Kadri Zeka” në Gjilan ka marrë akreditimin zyrtar për programin e ri master “Mësimdhënie e Gjuhës Angleze”, në kuadër të Fakultetit të Edukimit.
Vendimi për akreditim është marrë në mbledhjen e 138-të të Këshillit Shtetëror të Cilësisë (KShC).
Ky është programi i parë i këtij lloji në Kosovë dhe vjen si përgjigje ndaj nevojës për kuadro të kualifikuar në fushën e mësimdhënies së gjuhës angleze. Programi është njëvjeçar, me 60 kredi (ECTS), dhe ofron titullin akademik Master në Mësimdhënie të Gjuhës Angleze (MA).
Programi synon të pajisë studentët me njohuri teorike dhe praktike mbi metodologjitë bashkëkohore të mësimdhënies së gjuhës angleze, të zhvillojë aftësitë e tyre akademike dhe profesionale për të ligjëruar në të gjitha nivelet arsimore, si dhe të integrojë teknologjinë dhe mjetet digjitale në procesin mësimor. Po ashtu, programi përgatit studentët për realizimin e kërkimeve shkencore dhe prezantimin e tyre në kontekste akademike.
Pranimi i studentëve të parë do të realizohet në vitin akademik 2025/26, ndërsa kuota e lejuar është 40 studentë për një vit akademik.
Me këtë rast, Dekani i Fakultetit të Edukimit, Prof. Dr. Merxhan Abdyli, tha se akreditimi i këtij programi master është një arritje e rëndësishme për Fakultetin e Edukimit dhe një mundësi unike për të përgatitur kuadro të kualifikuar në fushën e mësimdhënies së gjuhës angleze, duke plotësuar nevojat bashkëkohore të arsimit në vend dhe më gjerë. Ai ka falënderuar të gjithë ata që kanë kontribuar në hartimin dhe zhvillimin e programit: “Në emër të Fakultetit të Edukimit, falënderoj stafin akademik, administrativ dhe partnerët tanë, të cilët me përkushtim dhe profesionalizëm bënë të mundur akreditimin e këtij programi unik në Kosovë,” ka thënë Dekani Merxhan Abdyli.
Universiteti Publik “Kadri Zeka” vazhdon të jetë i përkushtuar në ofrimin e programeve cilësore dhe në përgatitjen e kuadrove për tregun vendor dhe ndërkombëtar të punës.
