Ambasadori i Britanisë në Serbi viziton Bujanocin, takon zyrtarë instituconal komunal dhe nga KKSh, si dhe përfaqësues nga spektri politik
Në komunën e Bujnocit gjatë ditës ka qëndruar Ambasadori i Mbretërisë së Bashkuar në Serbi, Edward Ferguson.
Ai ka zhvilluar takime të ndryshme me përfaqësues institucional në këtë komunë, përfshirë kreun e KKSh-së Nevzad Lutfiu, kryetarin e Komunës së Bujanocit Arbër Pajaziti, si dhe të parin e PVD-së, njëherit deputetin shqiptar në Parlamentin e Serbisë, Shaip Kamberi.
Pas takimit të zhvilluar në selinë e KKSh-së, ka qenë vet z. Lutfiu, ai që ka njoftuar përkitazi me rrjedhen e takimit, ndërsa ka pasqyruar pritjet e KKSh-së lidhur me të drejtat e shqiptarëve në Luginën e Preshevës.
“Takim shumë i mirë me Ambasadorin e Mbretërisë së Bashkuar në Serbi, z. Edward Ferguson. Në të ardhmen e afërt presim që një grup ambasadorësh në Beograd të mblidhen për të trajtuar gjendjen e shqiptarëve në Serbi”, është shprehur pas takimit, Lutfiu.
Më pas, ambasadori i Mbretërisë së Bashkuar është takuar me kryetarin e Komunës së Bujanocit, Arbër Pajaziti, me të cilin kanë biseduar per tema të ndryshme aktuale në rajon që ndërlidhen me Luginën.
“Sot kisha një takim shumë të hapur dhe konstruktiv me Ambasadorin e Britanisë së Madhe në Serbi, Sh.T. Edward Ferguson. U pajtuam se stabiliteti në aspektin e sigurisë dhe ai politik janë kyç në zhvillimin e rajonit dhe të komunës sonë. Theksova ngecjet në integrimin e shqiptarëve në institucione si parakusht për barazi në shtetin ku jetojmë. Potencova rolin e madh të Britanisë dhe ndikimin e saj në këtë pjesë të Evropës prej shekujsh, duke nënvizuar nevojën për prezencë të vazhdueshme”, ka shkruajtur Pajaziti në faqen e tij, duke përshkruajtur më tej rrjedhën e bisedës, e cila sipas tij është fokusuar edhe në mbështetjen e projekteve konkrete për komunën e Bujanocit.
Krejt në fund të qëndrimit në Bujanoc, Ambasadori i Mbretërisë së Bashkuar në Serbi, Edward Ferguson, është pritur nga deputeti popullor Shaip Kamberi. Ky i fundit ka shkruajtur në faqen e tij se me ambasadorin ka diskutuar nja varg temash të rëndësishme, ndërsa ka theksuar domosdonë e prezencës ndërkombëtrae në Luginën e Preshevës.
“Prita në Bujanoc Ambasadorin e Mbretërisë së Bashkuar, Edëard Ferguson. Biseduam për rëndësinë e implementimit të Planit 7 pikësh. – Njohja e diplomave; ndalimi i pasivizimit selektiv e integrimi në institucione shtetërore, janë parakusht për ndërtimin e barazisë mes komuniteteve. Ambasadorit Ferguson i tregova edhe për rëndësinë që ka pjesmarrja e përfaqësuesëve politik të shqiptarëve në takimet e ambasadorëve të formatit “Miqt e Jugut”, prandaj kërkova që një gjë e till të na sigurohet për takimin e radhës”, ka shkruar Kamberi.
