Arrestohet pedagogu në Fakultetin e Ekonomisë, dhunoi kolegen në mjediset e Universitetit
Një ngjarje e paprecedentë ka ndodhur sërish në Fakultetin e Ekonomisë në Universitetin e Tiranës, ku përgjegjësi i departamentit të Marketingut ka goditur me grusht një pedagoge.
Bëhet fjalë për Mirdaim Axhamin, i cili është arrestuar nga policia, që njofton se 43-vjeçari ka goditur vartësen e tij, Liljana Billa. Ngjarja ka ndodhur dy ditë më parë rreth orës 19:30 në ambientet e Universitetit, ndërsa studentët kanë qenë duke zhvilluar provim. Këta të fundit pohojnë se kanë dëgjuar të bërtitura, zënka në koridor, pavarësisht kësaj provimi ka vijuar normalisht. Në vendngjarje ka mbërritur edhe ambulanca për t’i ardhur në ndihmë pedagoges.
“Specialistët për Hetimin e Krimeve të Komisariatit të Policisë Nr. 1 arrestuan shtetasin Mirdaim Axhami, 43 vjeç, banues në Tiranë, pasi për shkak të detyrës, dyshohet se ka goditur me grusht vartësen e tij”, njofton Policia.
Mediat raportojnë se debatet mes dy pedagogëve dyshohet të kenë nisur disa muaj më parë, për shkak të një votimi për kreun e departamentit në Fakultetin Ekonomik për shef departamenti, garë kjo që është fituar nga Axhami.
Nga ai moment debatet deri në fyerje kanë vijuar dhe pedagogia Liljana Billa ka bërë disa herë denoncim në polici, duke e akuzuar Axhamin edhe për përndjekje. Nga ana tjetër shefi i departamentit ka pretenduar se Billa nuk është mirë dhe ka probleme.
Konflikti i fundit ka nisur për shkak të tezave të një provim. Një tjetër konflikt mes tyre dyshohet se janë edhe përfshirja e tyre në politikë ku kanë shfaqur pakënaqësitë në PD.
