Rikthehet në aksion Superliga në futboll, dy ndeshje interesante sot
Pas pushimit ndërkombëtar, Superliga e Kosovës në Futboll rikthehet sot në aksion.
Në program janë dy sfida mjaft interesante, ku do të duelojnë dy nga tre skuadrat pretendente për titull.
Drita do të jetë mysafir i Malishevës, e cila është në formë të jashtëzakonshme të rezultatave.
Malishevasit kanë 9 fitore në 11 ndeshjet e fundit në kampionat, duke u renditur në vendin e 4-të me 47 pikë, vetëm tre më pak sesa kundërshtari i sotëm i tyre, Drita.
Gjilanasit ndërkohë janë në pozitën e tretë me 50 pikë, një më pak se Llapi e dyta dhe dy më pak se lideri Ballkani.
Ndeshja tjeter interesante është ajo mes Prishtinës dhe Ballkanit, e cila do të zhvillohet në Lipjan.
Suharekasit ndodhen pa fitore në dy ndeshjet e fundit, me një humbje nga Fushë Kosova dhe një barazim ndaj Llapit, teksa Prishtina vjen pas një barazimi ndaj Fushë Kosovës.
Ballkani ndodhet lider i tabelës me 52 pikë, ndërsa Prishtina pozicionohet në vendin e 5-të me 38 pikë të mbledhura.
Të dyja duelet fillojnë nga ora 15:00.
