Kurti me shokë e shoqe argëtohet pak në EtnoFest: Përjetuam një mbrëmje të këndshme
Kryeministri i Republikës së Kosovës, Albin Kurti, ka kaluar mbrëmjen e sotme në festivalin EtnoFest që mbahet në fshatin Kukaj.
Përmes një postimi në rrjetin social Facebook, Kurti ka thënë se bashkë me kolegët nga Qeveria dhe me shokët e shoqet e Lëvizjes Vetëvendosje, kanë kaluar një mbrëmje të këndshme.
Ai ka ftuar qytetarët që ta vizitojnë festivalin, i cili nesër ka natën e mbylljes.
“Edicioni i 13-të i EtnoFest. Festival që mbahet në fshatin Kukaj, afër Prishtinës. Bashkë me kolegë nga Qeveria e nga Lëvizja, me shoqe e shokë, e përjetuam një mbrëmje aq të këndshme nën performancën dedikuar dhe inspiruar nga Rizah Bllaca, disa ekspozita pikturash e skulpturash e të veprave të tjera arti, ndërkaq të premten e përmbylli Mentor Haziri me këngë mirë të zgjedhura. Ju ftoj ta vizitoni edhe ju të dashur, sidomos nesër në natën e mbylljes”, shkroi ai.
Posted byAlbin Kurtion Saturday, August 19, 2023
Ndërkohë kujtojmë që ditët e fundit ishin plot zhvillime.
Dy zyrtarët e Ministrisë së Industrisë, Ndërmarrësisë dhe Tregtisë, Irfan Lipovica dhe Hafiz Gara, bashkë me afaristin që njihet si person i afërt me Kurtin, Ridvan Muharremi, janë arrestuar dje nën dyshimet për keqpërdorime me rezervat shtetërore.
Gjykata Themelore në Prishtinë u ka caktuar atyre masën e paraburgimit në kohëzgjatje prej 30 ditësh nën dyshimet se kanë kryer veprat penale “Dhënie e ndihmës në kryerjen e veprës penale të keqpërdorimit të pozitës apo autoritetit zyrtar” dhe “Keqpërdorim i pozitës apo autoritetit zyrtar”.
Prokuroria Speciale e Republikës së Kosovës ka gjetur se përpos procedurës së kundërligjshme që është ndjekur në blerjet e rezervave shtetërore ka edhe shkelje të tjera pasi malli i paguar s’ka mbërritur në Kosovë.
Kështu, pavarësisht se janë paguar paratë te kompanitë turke e polake për grurë, vaj e sheqer në Kosovë nuk kanë ardhur kurrë 200 mijë litra vaj, 120 mijë kg sheqer dhe 52.5 tonë grurë.
Vlera e këtij malli që nuk ka mbërritur në Kosovë sipas Prokurorisë është mbi 600 mijë euro.
Burimi i lajmit: Gazeta Sinjali
