Arifi: Vetëvendosje ka përçarë spektrin politik të shqiptarëve në Luginë të Preshevës
Kryetari i Komunës së Preshevës, Shqiprim Arifi, ka kritikuar partinë në pushtet, Lëvizjen Vetëvendosje, pasi sipas tij, prej se ka ardhur në pushtet ka përçarë spektrin politik në Luginë të Preshevës.
Arifi ka theksuar se që nga viti 2015 e tutje deri në vitin 2020 ka pasur një unifikim të shqiptarëve atje, duke potencuar se në po këtë vit, kanë bërë një listë për zgjedhjet parlamentare në Serbi.
Sipas tij, ky unifikim që ka ndodhur për herë të parë pas 30 vjetësh, është përçarë nga VV-ja.
“Kur kemi filluar në 2015 kemi themeluar partinë dhe kemi qenë e dhjeta parti e themeluar në atë kohë. Sot, mbas 7-8 vite punë, e shohim që në Preshevë ka pasur një konsistencë një unifikim të spektrit politik, sepse sot kemi vetëm katër parti politike dhe një grup qytetar. Përshtypja që ekziston në Kosovë apo në shqiptari, që në në Preshevë jemi tepër të përçarë, nuk është reale, sepse në 2020 e kemi pasur një sukses në unifikim e spektrit politik shqiptar, që kemi bërë një listë për zgjedhjet parlamentare në Serbi, që ka ndodhur për herë të parë pas 30 viteve…”, ka thënë Arifi në Personale të RTV Dukagjini.
“Pastaj u përça sepse VV-ja i vendosi duart dhe e ka përçarë. Këtë e di çdo preshevar dhe çdo shqiptar që e përcjell politiken në Luginë të Preshevës, që më hyrjen e VV-së në pushtet, në atë moment dhe ndërhyrja e saj në Preshevës nuk ka sjellë vetëm përçarjen e kësaj liste, këtij procesi të unifikimi, por edhe ka sjellë probleme të tjera”, ka thënë Arifi. /Dukagjini/
