Kryeministrja e Zelandës së Re do të japë dorëheqjen muajin e ardhshëm
Jacinda Ardern ka njoftuar se do të japë dorëheqjen nga posti i kryeministres së Zelandës së Re përpara zgjedhjeve të këtij viti.
Deputetët e Partisë Laburiste do të votojnë për të gjetur zëvendësuesin e saj të dielën. Ky njoftim erdhi pasi sondazhet tregojnë se partia po përballet me një rrugë të vështirë për t’u rizgjedhur më 14 tetor.
Sipas BBC, Ardern ka thënë se, kishte marrë kohë për të shqyrtuar të ardhmen e saj gjatë pushimeve verore, duke shpresuar të gjente zemrën dhe energjinë për të vazhduar këtë detyrë.
“Por për fat të keq nuk e kam bërë dhe do t’i bëja një shërbim të keq Zelandës së Re nëse do të vazhdoj”, u tha ajo gazetarëve të enjten.
Ardern do të japë dorëheqjen deri më 7 shkurt. Nëse asnjë pasardhës i mundshëm nuk merr mbështetjen e dy të tretave të dhomës së partisë, vota do t’i shkojë anëtarëve të Laburistëve.
Ardern u bë gruaja më e re në krye të qeverisë në botë kur u zgjodh kryeministre në vitin 2017, në moshën 37-vjeçare.
