Vendoset gurthemeli i objektit të ri të Pediatrisë në Spitalin e Përgjithshëm të Gjilanit
Investimi prej rreth 1 milion euro synon kushte moderne për trajtimin e fëmijëve në Anamoravë
Sot u shënua një moment i rëndësishëm për shëndetësinë publike në Gjilan me vendosjen e gurthemelit të objektit të ri për Shërbimin e Pediatrisë në Spitalin e Përgjithshëm.
Investimi, me vlerë 996,687.37 euro, është inicuar nga Shërbimi Spitalor Klinik dhe Universitar i Kosovës dhe synon përmirësimin e kujdesit shëndetësor ndaj fëmijëve dhe krijimin e kushteve më moderne për trajtim dhe shërbime mjekësore. Objekti i ri do të ndërtohet në një hapësirë mbi 1000 m² dhe do të përfshijë infrastrukturë moderne për diagnostikim, trajtim dhe kujdes profesional.
Në ceremoni mori pjesë Kryeministri në detyrë i Kosovës, Albin Kurti, i cili tha se ndihet i gëzuar për këtë hap.
“Ky moment paraqet një zotim për shëndetësinë në Gjilan dhe Anamoravë, në mënyrë që të krijohen objekte moderne dhe kushte më të mira për pacientët dhe stafin. Ky rast është dyfish më i rëndësishëm, sepse bëhet fjalë për Pediatrinë, ku fëmijët do të marrin shërbimet e nevojshme. Llogarisni në ne, sepse Qeveria do të jetë gjithmonë pranë jush”, deklaroi Kurti.
Ministri i Shëndetësisë, Arben Vitia, theksoi se projekte të tilla do të vazhdojnë edhe në institucione të tjera shëndetësore për të ofruar shërbime sa më cilësore.
Drejtori i SHSKUK-së, Elvir Azizi, vlerësoi bashkëpunimin me Drejtorin e Spitalit të Gjilanit, Dr. Afrim Cana, dhe tha se ky investim do të krijojë kushte më funksionale për pacientët dhe stafin.
Dr. Cana e cilësoi projektin si “një hap të madh drejt avancimit të sistemit shëndetësor”, ndërsa drejtuesi i Shërbimit të Pediatrisë, Dr. Sadik Rashiti, tha se me këtë gurthemel fillon një kapitull i ri për kujdesin ndaj fëmijëve në ambiente moderne dhe dinjitoze.
Në ceremoni morën pjesë përfaqësues institucionalë, drejtues të institucioneve shëndetësore dhe profesionistë shëndetësorë.
