U VARRROS AGË REXHË KRYEZIU – THEMELUES I KF “STUDENTI”, VETERAN I SPORTIT DHE HUMANIST I NJOHUR NGA MIRESHI

Sot në varrezat e fshatit Dobërçan, iu dha lamtumira e fundit Agës Rexhë Kryeziu, veteranit të sportit, themeluesit të KF “Studenti”, veprimtarit të palodhshëm, humanistit dhe njeriut që ishte gjithmonë në shërbim të qytetarëve.

Në këtë ceremoni mortore morën pjesë familjarë, miq, bashkëvendas dhe shumë dashamirës, të cilët me dhimbje dhe respekt i dhanë lamtumirën e fundit një figure të respektuar të komunitetit.

Si shok i ngushtë i të birit të tij, Dr. Ekremit, pata fatin ta njoh nga afër si një mikpritës të rrallë, njeri me zemër të madhe, me energji të pashtershme pozitive, humor të këndshëm dhe gjithmonë i gatshëm për të qenë pjesë e çdo iniciative në të mirën e përbashkët. Prania e tij linte gjithmonë përshtypje të veçantë dhe të paharrueshme, ndërsa respekti që gëzoi ishte pasqyrim i veprave dhe karakterit të tij fisnik.

Ngushëllimet më të sinqerta familjes Kryeziu, udhëheqjes dhe lojtarëve të KF “Studenti”, bashkëvendasve, miqve të shumtë dhe të gjithë atyre që patën fatin ta njohin dhe të ndajnë momente me të.

I qoftë i lehtë dheu i Kosovës dhe i përjetshëm qoftë kujtimi dhe nderimi për të!