SHKOLLA “MUSA ZAJMI” GJILAN – Ligjëratë ndërgjegjësuese për sigurinë në internet në Shkollën “Musa Zajmi”
Në kuadër të bashkëpunimit me Policinë e Kosovës, në Shkollën Fillore dhe të Mesme të Ulët “Musa Zajmi” në Gjilan u mbajt një ligjëratë ndërgjegjësuese me temë siguria në internet dhe përdorimi i telefonave mobilë.
Gjatë kësaj veprimtarie, nxënësit u informuan mbi rëndësinë e përdorimit të sigurt dhe të përgjegjshëm të teknologjisë, si dhe për rreziqet që mund të paraqiten nga rrjetet sociale. U trajtuan tema të rëndësishme si mbrojtja e të dhënave personale, komunikimi online dhe pasojat e keqpërdorimit të internetit.
Përfaqësuesit e Policisë së Kosovës theksuan rëndësinë e kujdesit në përdorimin e pajisjeve digjitale dhe ofruan këshilla praktike për sigurinë e nxënësve në hapësirën online.
Nxënësit patën mundësi të diskutojnë dhe të parashtrojnë pyetje, duke e bërë aktivitetin interaktiv dhe mjaft të dobishëm për ta.
Në fund të aktivitetit, shkolla shprehu mirënjohje për Policinë e Kosovës për bashkëpunimin dhe kontributin e dhënë në edukimin dhe rritjen e sigurisë së nxënësve.
