Shkolla “Liria” në Pogragjë pajiset me 10 laptopë falë donacionit të Celonis Labs GmbH nga Gjermania
Shkolla Fillore “Liria” në Pogragjë ka përfituar një donacion prej 10 laptopësh nga kompania Celonis Labs GmbH, me seli në Mynih të Gjermanisë, një mbështetje e rëndësishme që synon avancimin e procesit edukativo-arsimor dhe zhvillimin e infrastrukturës teknologjike në këtë institucion arsimor.
Sipas njoftimit të shkollës, ky donacion do të kontribuojë në zhvillimin e aftësive digjitale të nxënësve, përdorimin më të gjerë të teknologjisë në mësimdhënie, avancimin e programimit dhe fushave STEM, si dhe në krijimin e kushteve më të mira për mësim dhe punë.
Një rëndësi të veçantë këtij donacioni i jep fakti se iniciatori i tij është bashkëvendësi Admir Jashari, ish-nxënës i Shkollës Fillore “Liria”, i cili, përmes angazhimit të tij në kompaninë Celonis Labs GmbH, bëri të mundur realizimin e këtij donacioni.
Nga shkolla vlerësojnë se kontributi i tij përbën një shembull frymëzues, duke dëshmuar se suksesi profesional mund të shoqërohet me përgjegjësi shoqërore, përkushtim dhe dashuri për vendlindjen dhe institucionin ku u hodhën hapat e parë të dijes.
Mirënjohje e veçantë i është shprehur edhe Ismet Jasharit për angazhimin dhe përkushtimin e tij gjatë gjithë procesit, deri në dorëzimin e laptopëve në shkollë. Sipas njoftimit, gatishmëria e tij për të ndihmuar dhe për të qenë pjesë e këtij realizimi përbën një vlerë të çmuar për shkollën dhe komunitetin.
Në fund, drejtuesit e shkollës, në emër të nxënësve, mësimdhënësve, stafit dhe gjithë komunitetit shkollor, kanë shprehur mirënjohjen e tyre për kompaninë Celonis Labs GmbH, si dhe falënderime të veçanta për Admir Jasharin dhe Ismet Jasharin për kontributin e dhënë në realizimin e këtij donacioni.
Nga shkolla theksohet se mbështetja për arsimin dhe investimi në teknologji përbëjnë një investim të drejtpërdrejtë në të ardhmen e brezave të rinj.
