Rikthim në kohë: KF Liria e Pogragjës dhe kujtimet e paharrueshme të vitit 1978
KF Liria nga fshati Pogragjë kishte traditë të hershme në futboll dhe ishte ndër klubet që mbante gjallë sportin në këtë anë të Anamoravës.
Qysh nga vitet e para të formimit, klubi u bë vendi ku u mblodhën shumë të rinj sportdashës të fshatit, me dëshirën për ta përfaqësuar vendlindjen me krenari në fushat e futbollit.
Në kohërat kur kushtet sportive ishin të vështira, dashuria për lojën ishte shumë më e madhe sesa mungesa e infrastrukturës.
Ndeshjet zhvilloheshin me shumë pasion, ndërsa fusha sportive ishte vendtakim i banorëve që mblidheshin për ta përkrahur klubin e zemrës. Çdo fitore e KF Lirisë sillte gëzim në gjithë fshatin, ndërsa humbjet pranoheshin me sportivitet dhe shpresë për ndeshjet e ardhshme.
Klubi nxori shumë futbollistë të talentuar, të cilët me përkushtim dhe disiplinë lanë gjurmë në sportin lokal. Për shumë të rinj të Pogragjës, fanella e KF Lirisë ishte krenari dhe ëndërr e fëmijërisë. Përveç sportit, klubi kishte edhe rol shoqëror, duke bashkuar gjenerata të ndryshme rreth futbollit dhe aktiviteteve sportive. Shumë të rinj, pas përfundimit të punëve të përditshme apo shkollës, mblidheshin në fushë, ku kalonin orë të tëra duke luajtur futboll dhe duke ndërtuar miqësi që vazhduan për vite me radhë.
- KF Liria Pogragjë – gjenerata 1978 – Nga e majta në të djathtë – Në këmbë: Xhafer Xhaferi, kryetar i KF Liria, Sokol Goci, Xhevdet Durmishi, Agim rexhepi, Hajrullah Kurteshi, Haki Ferizi, Kadrush behluli, Jakup bejtullahu – trajner – Ulur: Enver Hyseni, Nagip Rexhepi, Vehbi Dalii Mejdi Rexhepi dhe fehmi Hasani – kapiten
Kjo fotografi e vitit 1978, nw ndeshjen: Pasjan 2:3 Liria, sjell kujtime të veçanta për shumë gjenerata që e jetuan atë kohë me emocione, sport dhe shoqëri.
Oscar (Pasjan) 2:3 Liria (Pogragjë)
E veçanta e kësaj ndeshjeje ishte se golin e fitores për ekipin nga Pogragja e shënoi Fatmir Rexhepi, i cili, ndonëse kishte ardhur me vonesë, u inkuadrua në lojë dhe rezultoi të ishte kreator dhe realizator, njëherit edhe njeriu i fitores së skuadrës së Lirisë.
Ishin vite kur futbolli luhej me shumë zemër, ndërsa çdo ndeshje mblidhte banorët e fshatit rreth klubit dhe lojtarëve të tyre të dashur. Në ato vite, sporti kishte një rëndësi të madhe për rininë, sepse përveç garës sportive sillte edhe afërsi, respekt dhe unitet mes njerëzve.
Koha ka kaluar dhe shumë nga lojtarët e asaj gjenerate sot kujtohen me nostalgji nga familjarët, miqtë dhe sportdashësit. Fotografitë si kjo mbeten dëshmi e një kohe të bukur, ku vlera më e madhe ishte shoqëria dhe dashuria për vendlindjen. Për ata që nuk janë më në mesin tonë, Zoti i mëshiroftë dhe i pastë në parajsë, ndërsa kujtimi për ta do të mbetet gjithmonë pjesë e historisë së KF Liria dhe të fshatit Pogragjë.
Autor: Ismajl Veliu
