Shkëndija me fitore të madhe ndaj FCSB-së, mbetet në garë për histori evropiane
Kampioni i Maqedonisë së Veriut, Shkëndija, ka realizuar një sukses të jashtëzakonshëm duke e mposhtur në shtëpi skuadrën e njohur rumune FCSB me rezultat minimal 1-0.
Me këtë triumf, kuqezinjtë nga Tetova kanë siguruar një epërsi të çmuar para sfidës së kthimit në Bukuresht, ku do të kërkojnë të shkruajnë historinë.
Asnjë skuadër nga Maqedonia e Veriut deri më tani nuk ka arritur të kalojë në raundin e tretë kualifikues të Ligës së Kampionëve në këtë format të garës. Një kualifikim eventual i Shkëndijës jo vetëm që do të përbënte një moment historik, por gjithashtu do t’i siguronte klubit një pjesëmarrje të garantuar në fazën e grupeve të Ligës së Konferencës.
Duhet theksuar se të dyja skuadrat patën raste të mira shënimi, veçanërisht Shkëndija që rrezikoi qysh në minutën e 2-të me kapitenin Ibraimi, por gjuajtja e tij për pak sa nuk përfundoi në rrjetë.
Në minutën e 33-të, Tamba depërtoi fuqishëm në zonë dhe gjuajti nga rreth 10-12 metra, mirëpo portieri Tarnovanu reagoi në kohë dhe shpëtoi portën.
Skuadra rumune FCSB e mori iniciativën në pjesën e parë, duke krijuar disa raste të rrezikshme me Cisotti, Ngezana dhe Tanase, por portieri Gaye ishte i pakalueshëm dhe mbajti portën e paprekur.
Shkëndija u paraqit me agresivitet dhe energji në minutat e para, por pas minutës së 10-të, FCSB u organizua më mirë dhe mori kontrollin e lojës, duke detyruar skuadrën shqiptare nga Tetova të tërhiqet dhe të fokusohet në mbrojtje.
Edhe në vazhdim të minutave të tjera mysafirët u treguan shumë të shkathët në kundërsulme, duke tentuar të godasin tetovarët nga krahët, por deri në fund nuk kishte ndryshim rezultati.
Pjesa e dytë përsëri ishte e ngjashme me të parën, por kësaj radhe mysafirët nga Rumunia ishin ata që ishin dy herë shumë afër të shënojnë, me një goditje në shtyllë, ndërsa herën e dytë ishte portieri i kuqezinjve Gaye që shpëtoi kuqezinjtë.
Në minutën e 65-të të ndeshjes, Klinssman Cake dërgoi një harkim të shkëlqyer në zonën kundërshtare, ndërsa mbrojtësi Adamu Alhassanu shkëput lart dhe me goditje të saktë me kokë mposhti portierin deri atëherë të pakalueshëm, Tarnovanu. Një gol i bukur që elektrizoi tifozët në tribunat e stadiumit në Shkup.
Megjithatë, Shkëndija u përball me një rast të papritur në pjesën e dytë, pasi Kamer Çaka u ndëshkua me karton të kuq për një ndërhyrje të gabuar, duke e lënë ekipin me një lojtar më pak për minutat e mbetura të takimit. Por në anën tjetër gjithçka u barazua pasi Tanase kishte një ndërhyje të ashpër ndaj Liridon latifit dhe u përjashtua për të baraspeshuar gjithçka në terren.
Shkëndija deri në fund pati edhe disa raste me Tamban dhe Websterin e Latifin, por që ndeshja edhe pas shtatë minutave kohë shtesë u mbyll me rezultatin 1-0, që mbetet gjithçka e hapur për ndeshjen e kthimit që do të luhet në Bukurushte pas një jave.
