Shkëndija shpërthen ndaj arbitrimit në Maqedoninë e Veriut: Do ta njoftojmë edhe UEFA-n
Klubi futbollistik KF Shkëndija ka reaguar ashpër pas ndeshjeve të xhiros së 22-të në kampionatin elitar të Maqedonia e Veriut, duke akuzuar për vendime skandaloze të arbitrave dhe favorizim të klubit KF Vardar.
Në një komunikatë zyrtare, drejtuesit e klubit nga Tetova theksojnë se për një kohë të gjatë kanë zgjedhur të heshtin, duke shpresuar në reflektim nga institucionet përgjegjëse, por sipas tyre zhvillimet e fundit në kampionat kanë kaluar çdo kufi.
Reagimi i klubit vjen pas dy ndeshjeve të fundit të kampionatit, përkatësisht KF Shkëndija – FK Brera Strumica dhe FK Sileks – KF Vardar, për të cilat Shkëndija pretendon se janë shoqëruar me vendime të diskutueshme të arbitrave.
Sipas klubit tetovar, këto vendime po dëmtojnë rëndë integritetin e garës dhe po krijojnë një perceptim negativ për mënyrën se si po administrohet kampionati nga Federata e Futbollit e Maqedonisë së Veriut.
Drejtuesit e Shkëndijës theksojnë gjithashtu se investimet në klub janë private dhe nuk lidhen me fonde shtetërore apo komunale, duke paralajmëruar se nëse vazhdon, siç e quajnë ata, qasja e pabarabartë në garë, mund të vihet në pikëpyetje vazhdimi i investimeve.
Po ashtu, klubi ka paralajmëruar se për zhvillimet në kampionat do të informojë edhe institucionet ndërkombëtare të futbollit, përfshirë UEFA.
Komunikata e plotë e KF Shkëndija
Për një kohë të gjatë kemi zgjedhur të heshtim, duke besuar se institucionet përgjegjëse do të reflektojnë dhe do të marrin masa për të garantuar drejtësi në kampionat. Fatkeqësisht, ajo që ndodhi sot në dy ndeshjet e xhiros së 22-të të LPFMV-së (Shkëndija-Brera dhe Sileksi-Vardari) është kufiri i fundit.
Vendimet skandaloze të arbitrave, të cilat në mënyrë të përsëritur kanë favorizuar KF Vardar, po dëmtojnë rëndë integritetin e garës dhe po krijojnë një perceptim të rrezikshëm për mënyrën se si po administrohet nga Federata e Futbollit të Maqedonisë së Veriut ai që duhet të quhet “kampionati elitar”.
KF Shkëndija ka heshtur deri më tani me shpresën se do të ketë reflektim. Por, sot është e qartë se kjo heshtje e jona është interpretuar si dobësi.
Të detyruar nga ndodhitë e përsëritura, detyrohemi ta ngrisim zërin tonë dhe ta bëjmë shumë të qartë një gjë! Investimet në KF Shkëndija nuk janë para të komunës, e as të shtetit. Janë investime private, janë mundi dhe sakrifica jonë për të ndërtuar një klub serioz që përtej qytetit, përfaqëson denjësisht edhe vendin në garat ndërkombëtare. Pikërisht aty ku me investimet tona dhe sukseset në fushë, aty ku na u la të luajmë të lirë me kushte të barabarta me tjerët, përveç klubit, i kemi sjellë benefite të shumta edhe ligës vendore, klubeve dhe vendit.
Nëse kjo qasje e pabarabartë ndaj garës vazhdon, me referime skandaloze ne do të jemi të detyruar të vëmë seriozisht në pikëpyetje vazhdimin e investimeve tona në këtë ambient. Njëkohësisht, për gjithë ngjarjet, rrjedhën dhe zhvillimet e kampionatit tonë do të informojmë institucionet ndërkombëtare, përfshirë edhe UEFA-në.
Futbolli duhet të vendoset në fushë, jo në tavolinë. Shkëndija nuk kërkon asgjë më shumë se kaq!
