Riad Rashiti – PDK Gjilan: Në këtë qeverisje, gratë e Gjilanit janë diskriminuar në secilën pozitë udhëheqëse në institucionet komunale
Kryetari i degës së PDK-së në Gjilan, Riad Rashiti, përmes një reagimi ka thënë se në vend të urimit për 8 marsin, kryetari i komunës është dashtë të turpërohet dhe të kërkoj falje për diskriminimin e rëndë që ia ka bërë grave të Gjilanit gjatë qeverisjes tij.
Sipas tij, në qeverisjen e kryetarit Hyseni, gratë e Gjilanit janë diskriminuar në secilën pozitë udhëheqëse, përfshirë suspendimet e disa prej tyre, për të cilat thotë se z. Hyseni ka ndikuar të dorëhiqen nga pozitat udhëheqëse.
“Ai i ka detyruar të dorëhiqen mbi dhjetë gra nga pozitat e tyre udhëheqëse, vetëm përshkak se ato kanë treguar integritet dhe vendosmëri në punën e tyre të drejtë dhe ligjore, duke mos iu nënshtruar presionit dhe kërkesave të jashtëligjshme të kryetarit të komunës, siç janë punësimet e shumta të familjarëve të tij, për dhënien e subvencioneve të ndryshme, të granteve, të tenderëve, të lejeve ndërtimore dhe të pagesave të jashtëligjshme nga buxheti i komunës”, ka thënë Rashiti.
Reagimi/Postimi i plotë i z. Rashiti:
Në vend të urimit për 8 marsin, kryetari i komunës është dashtë të turpërohet dhe të kërkoj falje për diskriminimin e rëndë që ia ka bërë grave të Gjilanit gjatë qeverisjes tij.
Në qeverisjen e Alban Hysenit, gratë e Gjilanit janë diskriminuar në secilën pozitë udhëheqëse kudo nëpër institucionet komunale. Ai i ka detyruar të dorëhiqen mbi dhjetë gra nga pozitat e tyre udhëheqëse, vetëm përshkak se ato kanë treguar integritet dhe vendosmëri në punën e tyre të drejtë dhe ligjore, duke mos iu nënshtruar presionit dhe kërkesave të jashtëligjshme të kryetarit të komunës, siç janë punësimet e shumta të familjarëve të tij, për dhënien e subvencioneve të ndryshme, të granteve, të tenderëve, të lejeve ndërtimore dhe të pagesave të jashtëligjshme nga buxheti i komunës.
Prej 12 drejtorive sa i ka komuna e Gjilanit, sot janë vetëm tri gra në pozita udhëheqëse, ndërsa sipas kuotës gjinore minimalisht është dashtë të jenë së paku katër drejtoresha në këto pozita udhëheqëse.
Sepse, dy drejtoresha të Arsimit janë përballur rëndë përmes presionit të kryetarit të komunës, njëra duke dhënë dorëheqje, tjetrën duke e larguar nga pozita sepse nuk i është nënshtruar atij.
Ndaj dy drejtoreshave të shëndetësisë poashtu ka vepruar njësoj. Dhe sot këto dy drejtori komunale e Arsimit dhe e Shëndetësisë udhëhiqen nga “burrat e fortë të VV-së”.
E vetmja drejtoresha e inspeksionit është që i ka shpëtuar largimit nga pozita e saj udhëheqëse. Fatkeqësisht, falë heshtjes së saj ndaj ndërtimeve të jashtëzakonshme që po ndodhin pa kurfar leje ndërtimore. Sepse ajo e ka zgjedhur rrugën e saj të mosveprimit, që të mos bie ndeshë me interesat e ngushta dhe pazaret e kryetarit të Gjilanit.
Aktualisht sot, po ky kryetar komune është duke i bërë presion të paparë drejtoreshës së buxhetit dhe financave për të dhënë dorëheqje prej pozitës së saj, sepse nuk po ia realizon kërkesat e jashtëligjshme të kryetarit të Gjilanit.
Ndërsa ka edhe shumë raste të tjera, por po i theksojë disa prej tyre:
– Drejtoreshën e Prokurimit e ka detyruar të dorëheqet nga pozita udhëheqëse, sepse nuk ka lejuar të favorizohen kompani të caktuara për të marr tenderë sipas kërkesës së kryetarit të komunës
– Te urbanizmi poashtu i ka larguar gratë nga pozitat udhëheqëse të sektorëve në kuadër të kësaj drejtorie, përshkak se nuk janë lejuar anashkalime të procedurave për lëshimin e lejeve ndërtimore.
– ZKF-në (Zyrtaren Kryesore Financiare) në drejtorinë për buxhet dhe financa e ka larguar dhe zëvendësuar me të gjinisë kundërt. Sepse nuk ka pranuar qasjen e favorizimit për ekzekutimin e pagesave milionëshe sipas kërkesave të kryetarit të komunës.
– Drejtoreshën e QKMF përmes presioneve të drejtëpërdrejta të kryetarit të komunës, e ka detyruar të dorëhiqet nga pozita dhe ka emëruar një tjetër të gjinisë kundërt. Sepse ajo nuk ka lejuar punësime të jashtëligjshme në QKMF, ndërsa me UD së drejtorit “burrë” e ka bërë kaos QKMF-në në çdo aspekt.
– Drejtoreshën e dalluar të shkollës fillore “Thimi Mitko” e ka luftuar për ta larguar, por e cila përmes gjykatës e ka ri-fituar pozitën e saj.
Pra kjo është “puna e madhe” e kryetarit të komunës së Gjilanit, që e ka bërë gjatë këtyre viteve për t’a fuqizuar pozitën e gruas në udhëheqje institucionale.
E fatkeqësisht, të vetmen fuqizim për gratë, kryetari e ka bërë duke i punësu kunatat, balldëskat, gratë e shokëve dhe mbesat e veta. Kaq ka bërë kryetari i komunës për gratë, e që vërtet është e turpshme qasja e tij ndaj grave të Gjilanit.
