Prishtina e Trepça’89 ndalin pikët e plota në shtëpi, Gjilani fiton si mysafir
15 prill, 2023 – Prishtina është rikthyer te fitorja në Albi Mall Superligën e Kosovës në futboll, pasi të shtunën, në stadiumin “Fadil Vokrri” e ka mundur Ferizajn, me rezultat 2:0, në kuadër të xhiros së 29-të.
Për dallim nga pjesa e parë, në të cilën ishin mysafirët që e mbizotëruan lojën, në pjesën e dytë Prishtina ishte më e mirë dhe arriti që të realizojë dy herë. Rezultatin e zhbllokoi Leotrim Kryeziu, në minutat shtesë të pjesës së parë nga penalltia, derisa rezultatin përfundimtar e vulosi Endrit Krasniqi, në minutën e 74-t. Pas kësaj fitoreje Prishtina mbetet në pozitën e katërt me 41 pikë, ndërsa Ferizaj në pozitën e tetë me 31 pikë.
Fitore para tifozëve të vet ka realizuar edhe Trepça’89, që e ka mundur Llapin, me rezultat 2:1. Deri te arkëtimi i tri pikëve tejet të rëndësishme në garën për mbijetesë në elitë skuadra e Shpëtim Idrizit ka arritur me përmbysje të rezultatit. Ilir Krasniqi shënoi për llapjanët në minutën e 25-të. Shifrat I barazoi Abdulah Oyekanmit, në minutën e 67-të, derisa për fitoren e “minatorëve” u përkujdes Samir Sahiti, i cili realizoi nga pika e bardhë në minutat shtesë të ndeshjes. Pas kësaj fitoreje Trepça ’89 ngjitet në pozitën e shtatë me 33 pikë, kurse Llapi mbetet në pozitën e pestë me 39 pikë.
Ndërkohë, Gjilani ka shënuar fitore si mysafir kundër Malishevës, me rezultat 2:0. Të dy golat mysafirët i shënuan në pjesën e parë. Oltion Bilalli në minutën e 12-të dhe Mevlan Zeka, në minutën e 30-të u përkujdesen për tri pikë të reja të Gjilanit, i cili e përforcon pozitën e tretë në renditje me 43 pikë. Në anën tjetër, Malisheva tani ndodhet në pozitën e parafundit, me 30 pikë.
