“Komuna e Gjilanit nis zbatimin e projekteve nga buxhetimi me pjesëmarrje”
Ka nisur procesi i implementimit të disa projekteve që kanë dalë nga buxhetimi me pjesëmarrje të qytetarëve në Komunën e Gjilanit.
Drejtori i Shërbimeve Publike, Infrastrukturës dhe Banimit, Kushtrim Ibrahimi, së bashku me stafin e drejtorisë dhe Zyrën e Projekteve, kanë dalë në terren për të vizituar disa lagje ku pritet të realizohen projektet e votuara nga qytetarët.
“I lumtur që këtë vit po fillojmë me implementimin e disa projekteve që kanë dalë nga procesi i buxhetimit me pjesëmarrje të qytetarëve”, tha Ibrahimi.
Ai bëri të ditur se vizitat janë zhvilluar në Lagjen e Tetë, në Rrugën e Prishtinës, në Lagjen e Zabelit, në Livadhet e Arapit si dhe në fshatin Livoq i Ulët, përkatësisht në Lagjen e Muhaxherëve.
Sipas tij, gjatë vizitave janë takuar qytetarë të këtyre zonave dhe drejtues të shkollave, me të cilët gjatë vitit të kaluar janë mbajtur dy takime në kuadër të procesit të buxhetimit me pjesëmarrje.
Në këto takime, banorët patën mundësinë të votojnë për projektet që dëshirojnë të realizohen në lagjet e tyre.
“Disa nga projektet që pritet të realizohen janë kënde lojërash për fëmijë, parqe dhe parkingje pranë shkollave”, tha Ibrahimi.
Ai shtoi se qëllimi i vizitave në terren ishte përcaktimi i lokacioneve ku do të realizohen këto projekte.
“Fillimisht do të përgatiten projektet, ndërsa më pas do të vazhdohet me procedurat e nevojshme deri në implementimin e tyre. Së bashku për lagje më të mira dhe kushte më të mira për qytetarët tanë”, u shpreh drejtori Ibrahimi.
