UKZ organizoi punëtorinën e Laboratorëve Social AUREA për përmirësimin e njohjes automatike të krediteve
Universiteti Publik “Kadri Zeka” organizoi me sukses punëtorinë e Laboratorëve Socialë, pjesë e projektit evropian AUREA. Ky aktivitet u fokusua në zhvillimin e praktikave të njohjes automatike dhe të plotë të krediteve për studentët që marrin pjesë në programe mobiliteti ndërkombëtar dhe synoi të ofrojë një hapësirë bashkëpunuese për shkëmbimin e përvojave dhe zgjidhjeve institucionale.
Punëtoria u hap nga Rektori i UKZ-së, prof. asoc. dr. Artan Dermaku, i cili theksoi rëndësinë e pjesëmarrjes së universitetit në projekte evropiane dhe rolin kyç të mobilitetit studentor në ndërkombëtarizimin e arsimit të lartë.
Ai vuri në dukje se projektet si AUREA kontribuojnë në forcimin e transparencës, besueshmërisë dhe harmonizimit të procedurave akademike, duke lehtësuar kalimin e studentëve në universitetet partnere dhe duke përmirësuar cilësinë e përgjithshme të arsimit të lartë.
Më pas, Betim Berisha, u.d. udhëheqës i Zyrës për Bashkëpunim Ndërkombëtar, prezantoi qëllimet e seminarit dhe rolin e Laboratorit Social si një platformë bashkëpunimi. Ai shpjegoi se seminari synon të prezantojë gjetjet e projektit, të validojë kornizën e faktorëve mundësues për njohjen automatike të krediteve, dhe të identifikojë sfidat dhe zgjidhjet institucionale që mund të implementohen në nivel akademik, kombëtar dhe evropian.
Luljete Berisha, menaxhere e projektit AUREA në UKZ, foli për rëndësinë e përkufizimit të përbashkët të njohjes automatike dhe të plotë të krediteve. Ajo nënvizoi se përdorimi i ECTS dhe i marrëveshjeve të mësimit (Learning Agreements) është thelbësor për të siguruar njohje të drejtë dhe transparente të krediteve, duke shmangur vonesat dhe moskuptimet ndërmjet universiteteve partnere.
Në këtë punëtori morën pjesë edhe Joana Azeiteiko dhe Jeanne Cuny nga European Students Union (ESU), udhëheqëse të projektit AUREA, të cilat kontribuan me perspektivën e studentëve dhe rëndësinë e përfshirjes së tyre në procesin e njohjes. Joana Azeiteiko theksoi se angazhimi i studentëve në këtë proces është thelbësor për të siguruar që njohja automatike e krediteve të reflektojë realitetin e përvojës studentore dhe të forcojë besimin ndërinstitucional.
Më pas, Punëtoria u zhvillua në formë prezantimesh, diskutimesh plenare dhe punë grupore. Pas prezantimit të projektit AUREA dhe objektivave të laboratorit social, u diskutua mbi përkufizimin e njohjes automatike të krediteve dhe mbi sfidat që hasin institucionet në praktikën e përditshme të njohjes.
Një nga momentet kryesore të seminarit ishte prezantimi i kornizës së faktorëve mundësues për njohjen automatike, e cila identifikon faktorët që mundësojnë ose pengojnë njohjen automatike të krediteve. Pjesëmarrësit punuan në grupe për të validuar këtë kornizë, duke ndarë përvoja dhe rekomandime praktike. Diskutimet u fokusuan në politikat institucionale, dizajnin e kurrikulave, përdorimin e marrëveshjeve të mësimit, zhvillimin e kapaciteteve të stafit dhe përdorimin e infrastrukturës digjitale për menaxhimin e mobilitetit.
Gjithashtu, u prezantuan praktikat më të mira të njohjes automatike të krediteve, duke përfshirë përdorimin e plotë të ECTS, katalogëve të qartë të lëndëve dhe aprovimin e marrëveshjeve të mësimit para fillimit të mobilitetit. Diskutimet në grupe u fokusuan në adresimin e sfidave dhe zhvillimin e zgjidhjeve institucionale, si përmirësimi i komunikimit me studentët, integrimi i procedurave të njohjes në sistemet digjitale dhe koordinimi më i mirë ndërmjet fakulteteve dhe Zyrës Ndërkombëtare.
Gjatë seminarit, u diskutuan edhe veprimet që UKZ synon të ndërmarrë në afat të shkurtër, duke përfshirë zhvillimin e një rregulloreje institucionale mbi mobilitetin dhe njohjen e krediteve, sigurimin që marrëveshjet e mësimit të miratohen plotësisht para mobilitetit, ofrimin e udhëzimeve të qarta për koordinatorët dhe fakultetet, organizimin e trajnimeve për stafin akademik dhe administrativ mbi njohjen dhe ECTS, dhe përmirësimin e komunikimit me studentët për të kuptuar qartë procesin e njohjes.
Në këtë kontekst, stafi akademik dhe administrativ që ka menaxhuar mobilitetet, si dhe studentët që kanë përfituar nga programet e mobilitetit në BE, paraqitën perspektiva të ndryshme, duke dhënë input të vlefshëm mbi sfidat dhe përfitimet reale të praktikave aktuale të njohjes. Përvoja e tyre ishte thelbësore për diskutimet mbi harmonizimin dhe automatizimin e procedurave të njohjes së krediteve në UKZ dhe institucionet partnere.
Ndërkohë, veprimet afatmesme synojnë zhvillimin e tabelave të ekuivalencës së lëndëve me universitetet partnere, forcimin e bashkëpunimit ndërmjet fakulteteve dhe Zyrës Ndërkombëtare, përdorimin e mjeteve digjitale për menaxhimin e mobilitetit dhe ndjekjen e njohjes, integrimin e procedurave të njohjes në sistemin e informacionit të studentëve dhe inkurajimin e fakulteteve për të përfshirë “dritaret e mobilitetit” në programet akademike.
Rezultati i pritur është rritja e njohurive institucionale, përmirësimi i procesit të njohjes dhe kalimi gradual nga njohja rast pas rasti drejt njohjes automatike dhe të plotë të krediteve.
Punëtoria e Laboratorit Social AUREA nxori në pah rëndësinë e bashkëpunimit ndërinstitucional dhe ndërkombëtar dhe theksoi rolin e stafit dhe studentëve të mobilitetit si partnerë aktivë në zhvillimin e praktikave të njohjes akademike. Rezultatet dhe rekomandimet e dala nga diskutimet do të përdoren për zhvillimin e mëtejshëm të mjeteve dhe udhërrëfyesve të projektit AUREA, duke kontribuar në forcimin e praktikave të njohjes akademike në arsimin e lartë në nivel evropian.
Partnerë të projektit AUREA, që financohet nga Bashkimi Evropian përmes programit Erasmus+, janë udhëheqës European Students’ Union (ESU), ndërsa partnerë tjerë janë Erasmus Student Network (ESN), European University Foundation (EUF), European University Association (EUA), Eotvos Lorand Tudomanyegyetem (ELTE), Universiteit Gent (UGENT), Philipps Universität Marburg (UMarburg) dhe Universiteti Publik Kadri Zeka (UKZ).
